اباي وبلىسىنىڭ كادرلىق قاجەتتىلىگىنىڭ وڭىرلىك كارتاسىن ازىرلەۋگە ارنالعان ماڭىزدى باسقوسۋدا مەملەكەت باسشىسىنىڭ «جاڭا كاسىپتەر مەن داعدىلار اتلاسىن ازىرلەۋ» جونىندەگى تاپسىرماسىنا سايكەس ەڭبەك نارىعىنداعى ناقتى سۇرانىستار تالقىلانىپ, كادر دايارلاۋ جۇيەسىن جاڭا ەكونوميكالىق تالاپتارعا ساي بەيىمدەۋ جايى بەزبەندەلدى.
شاكارىم ۋنيۆەرسيتەتىندە بولعان فورسايت-سەسسيا جۇمىسىنا عىلىم جانە جوعارى ءبىلىم ءمينيسترى ساياسات نۇربەك ونلاين قاتىسىپ, كاسىبي كادرلاردى دايارلاۋدىڭ ءتيىمدى جۇيەسىن قالىپتاستىرۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن ايتتى.
«پرەزيدەنت قاسىم-جومارت توقاەۆ جولداۋىندا ادام كاپيتالىن دامىتۋ, ءبىلىم بەرۋ جۇيەسىن جاڭعىرتۋ, كاسىپتىك ءبىلىمنىڭ پراكتيكالىق باعىتىن كۇشەيتۋدى نەگىزگى مىندەت رەتىندە بەلگىلەگەن بولاتىن. وسىعان وراي وتكەن 2025 جىل جۇمىسشى ماماندىقتار جىلى دەپ جاريالاندى. بۇل كادرلىق ساياسات ەل ەكونوميكاسىنىڭ تۇراقتى دامۋى ءۇشىن وزەكتى ماسەلە ەكەنىن كورسەتەدى», دەدى مينيستر.
سونداي-اق ول 2022 جىلدان بەرى «ماماندىعىم – بولاشاعىم» جوباسى اياسىندا 24 سالانى قامتيتىن 9 وڭىرلىك كارتا ازىرلەنگەنىن, 100 مىڭنان استام وقۋشى كاسىبي باعدارلاۋ دياگنوستيكاسىنان وتكەنىن, 290 ءبىلىم باعدارلاماسى پىسىقتالعانىن جەتكىزدى. بۇل باستامالار ءبىلىم مەن ەڭبەك نارىعى اراسىنداعى تەپە-تەڭدىكتى قامتاماسىز ەتۋگە ارنالادى.
شاكارىم ۋنيۆەرسيتەتىنىڭ ستراتەگيا جانە الەۋمەتتىك دامۋ جونىندەگى پرورەكتورى اسقار قاسىموۆ ەلىمىزدە 9 وڭىردە جاڭا كاسىپتەر اتلاسى دايىندالعانىن ءمالىم ەتتى. ول قازىرگى تسيفرلاندىرۋ داۋىرىندە ءبىراز ماماندىقتار جاڭاشا سيپات الىپ, جاڭا داعدىلار قالىپتاسادى دەپ بولجايدى.
جيىندا اباي وبلىسى ءبىلىم باسقارماسىنىڭ تەحنيكالىق جانە كاسىپتىك ءبىلىم بەرۋ ءبولىمىنىڭ باسشىسى ۆيلەنا جاقىپباەۆا وڭىرگە قاجەتتى كادرلىق كارتاسىن ازىرلەۋدىڭ ماڭىزىنا توقتالدى. ول اتالعان كارتا ءبىلىم بەرۋ ۇيىمدارىنا جاڭا باعدار بەرىپ, جۇمىس بەرۋشىلەردىڭ سۇرانىسىن ناقتى ايقىنداۋعا مۇمكىندىك تۋعىزاتىنىن ايتتى. جوعارى ءبىلىم بەرۋدى دامىتۋ ۇلتتىق ورتالىعى «ماماندىعىم – بولاشاعىم» كەڭسەسىنىڭ باسشىسى ولجاس ساكەنوۆ جوبانىڭ ءمانى مەن مىندەتتەرىن جان-جاقتى ءتۇسىندىردى.
«جاڭا كاسىپتەر مەن مىندەتتەردىڭ اتلاسىن ازىرلەۋ – قالا مەن اۋىل اراسىنداعى ەكونوميكالىق الشاقتىقتى ازايتۋعا, ەڭبەك نارىعى مەن ءبىلىم بەرۋ سالاسىنداعى قاجەتتى اقپاراتتارمەن قامتۋعا, وڭىردەگى ەڭبەك ونىمدىلىگى مەن حالىق تابىسىن ارتتىرۋعا باعىتتالعان», دەيدى ول.
سەسسياعا قاتىسۋشىلار اباي وبلىسىنىڭ ەكونوميكالىق مۇمكىندىكتەرىن, ترەندتەرىن, سىن-قاتەرلەرىن دە ساراپقا سالدى. الداعى ۋاقىتتا وڭىردە سۇرانىسى ارتىپ كەلە جاتقان جاڭا كاسىپتەر مەن قاجەتتى ماماندىقتار, كادر ساياساتىن جەتىلدىرۋدىڭ جولدارى ايقىندالىپ, وبلىستىڭ كادرلىق قاجەتتىلىگىنىڭ ناقتى كارتاسى ازىرلەنەدى. بۇل كارتا وبلىستىڭ الەۋمەتتىك-ەكونوميكالىق دامۋ ستراتەگياسىن جەتىلدىرىپ, ءبىلىم بەرۋ ۇيىمدارى مەن كاسىپورىندار اراسىنداعى بايلانىستى نىعايتا تۇسەرى ءسوزسىز.
اباي وبلىسى