بىلتىر 119-دان استام كىتاپ 240 500 دانا تارالىممەن باسىلىپ, ەلىمىزدىڭ وڭىرلىك كىتاپحانالارىنا جەتكىزىلدى. بۇل تۋرالى مادەنيەت جانە اقپارات مينيسترلىگىنىڭ ءباسپاسوز قىزمەتى حابارلاپ وتىر, دەپ جازادى Egemen.kz.
وڭىردەگى كىتاپحانالارعا جولدانعان كىتاپتار اراسىندا «شوقان. ەرەك تۋعان فەنومەن» ءفوتوالبومى, اباي قۇنانباي ۇلىنىڭ 180 جىلدىعىنا ارنالعان ەڭبەكتەر, «باقىتسىز جامال» شىعارماسى, سونداي-اق ءىلياس ەسەنبەرلين, جۇمەكەن ناجىمەدەنوۆ, قادىر مىرزا ءالى جانە تۇمانباي مولداعاليەۆتىڭ شىعارمالار جيناعى بار.
ايتا كەتەيىك, حالىقارالىق ىنتىماقتاستىق اياسىندا يتاليا تاراپىنىڭ قولداۋىمەن شوقان ءۋاليحانوۆ تۋرالى كىتاپتىڭ يتاليان جانە اعىلشىن تىلدەرىنە اۋدارىلعان نۇسقاسىنىڭ تانىستىرىلىمى ريم قالاسىندا ءوتتى.
قايتا تۇلەگەن كىتاپحانالار
«مادەنيەت جانە اقپارات مينيسترلىگى ەلىمىزدىڭ ماينداعى فرانكفۋرت قالاسىندا وتكەن ەڭ ءىرى حالىقارالىق كىتاپ جارمەڭكەسىنە ەكىنشى رەت قاتىسۋىن دا قولدادى. كورمەدە ۇلتتىق پاۆيلون ۇيىمداستىرىلىپ, مەرەيتويلىق باسىلىمدار, سونىڭ ىشىندە جەتى تىلگە اۋدارىلعان «ابايدىڭ قارا سوزدەرى. ۇرپاققا ۇلاعات» اتتى ەڭبەگى تانىستىرىلدى. ال «باقىتسىز جامال» رومانى ۇلتتىق پروزانىڭ العاشقى تۋىندىلارىنىڭ ءبىرى رەتىندە حالىقارالىق دەڭگەيدە جوعارى باعاعا يە بولدى», دەلىنگەن مينيسترلىك تاراتقان حابارلامادا.
قازاق ادەبيەتىن ناسيحاتتاۋ جۇمىسى ەل ىشىندە دە جالعاسىپ جاتىر. مينيسترلىك وكىلدەرى بەيجىڭ مەن گۋانچجوۋ قالاسىندا وتكەن حالىقارالىق كىتاپ كورمەلەرىنە قاتىسىپ, كلاسسيكتەر مەن قازىرگى زامان اۆتورلارىنىڭ شىعارمالارىن تانىستىردى.
انتيكادان استاناعا دەيىن: كىتاپحانالار قالاي جاڭارتىلىپ جاتىر؟
جاس جازۋشىلاردى قولداۋعا ەرەكشە كوڭىل ءبولىندى. مينيسترلىك پەن قازاقستان جازۋشىلار وداعى اراسىنداعى ستراتەگيالىق سەرىكتەستىك اياسىندا جاڭا اۆتورلار بۋىنىن قالىپتاستىرۋعا باعىتتالعان ءۇش اۋقىمدى جوبا جۇزەگە استى. ناتيجەسىندە 35 كوركەم جانە عىلىمي-تانىمدىق جيناق جارىق كورىپ, كىتاپحانالارعا جەتكىزىلدى.