2026 جىلى قانداي تاقىرىپتاردا كينو تۇسىرۋگە بولادى؟

ەسكە سالايىق, ۇلتتىق كينونى قولداۋ مەملەكەتتىك ورتالىعى ۇلتتىق فيلم مارتەبەسىنە ۇمىتكەر كينوجوبالاردى ىرىكتەۋ ماقساتىندا جىل سايىن كونكۋرس وتكىزەدى. وسىعان وراي ورتالىق 2026 جىلعا ارنالعان كينوجوبالاردى ىرىكتەۋ بارىسىندا باسشىلىققا الىناتىن باسىم تاقىرىپتار ءتىزىمىن جاريالاپ وتىر. 

كونكۋرسقا ۇسىنىلاتىن كينوجوبالار بەكىتىلگەن باسىم تاقىرىپتارعا سايكەس بولۋى ءتيىس.

بيىل اسىرەسە, وتان, تۋعان جەرگە دەگەن سۇيىسپەنشىلىك, وتباسى (اكەلەر مەن بالالار: ۇرپاقتار ساباقتاستىعى), تاريح, ونىڭ ماڭىزى مەن قۇندىلىعى, بۇگىنگى كۇننىڭ باتىرلارى: ەڭبەكقور ادام بەينەسى, قازىرگى قوعامداعى ايەلدەردىڭ ءرولى: مادەنيەتكە, عىلىمعا, وتباسىعا, ەكونوميكا مەن الەۋمەتتىك باستامالارعا قوسقان ۇلەسى كورىنىس تابۋى ءتيىس. 

وزگە تاقىرىپتاردىڭ ءتىزىمى مىناداي: 

• قازاق ەرتەگىلەرى مەن ەپوستارى;

• بالالارعا ارنالعان فيلمدەر;

• تاريحي تۇلعالار (كورنەكتى قايراتكەرلەر تۋرالى فيلمدەر);

• قورشاعان ورتا, تابيعاتتى قورعاۋ. جاسىل ەنەرگەتيكا;

• قازىرگى زامانعى وتان قورعاۋشى بەينەسى: ەرلىك پەن جاۋاپكەرشىلىك;

• زاڭدى ساقتاۋ, قۇقىقتىق ءتارتىپ پەن ادىلەتتى قوعام قۇرۋدى نىعايتۋ. «زاڭ جانە ءتارتىپ» قاعيداسى;

• سالاۋاتتى ءومىر سالتى جانە سپورت تاقىرىبىنداعى فيلمدەر;

• بىرلىك پەن بەيبىتشىلىك (ۇلتارالىق كەلىسىم): مادەنيەتتەر مەن حالىقتار اراسىنداعى قۇرمەت پەن ىنتىماقتاستىق;

• قازىرگى جاستار ماسەلەلەرى: جاڭا بۋىننىڭ قۇندىلىقتارى مەن ءومىر ەرەكشەلىكتەرى;

• اۋىلىم – التىن بەسىگىم;

• عارىش جانە عالام;

• تسيفرلىق قوعام (جاساندى ينتەللەكتتىڭ, زاماناۋي تەحنولوگيالار مەن IT-مامانداردىڭ ءرولى, تەحنولوگيالار جانە كوپدەڭگەيلى شىنايىلىق الەمى);

• ۇلتتىق قۇندىلىقتار: تۋعان جەرگە دەگەن سۇيىسپەنشىلىك, تابيعاتقا قۇرمەت, ادالدىق, ادىلدىك – مادەني ءداستۇردىڭ ءبىر بولىگى رەتىندە;

• زاماناۋي باتىرلار: جاس كورەرمەنگە ۇلگى بولارلىق تۇلعالار;

• دوستىق پەن ءوزارا كومەكتىڭ قۇندىلىعى;

• ىزدەنىمپاز جانە ءبىلىمدى ۇرپاق;

• فەنتەزي الەمى;

• بالالارعا ارنالعان عىلىمي-تانىمدىق وقيعالار;

• ءبىزدىڭ وتان: ەتنوگرافيالىق ەرەكشەلىكتەر, تابيعات, ولكە تاريحى;

• قوعامنىڭ وزەكتى الەۋمەتتىك ماسەلەلەرى;

• تانىمدىق تاقىرىپتار: ءبىلىم, يننوۆاتسيالار, عىلىم مەن ونەر جەتىستىكتەرى;

• تۋريزم;

• تازا قازاقستان;

• كىتاپ. ءبىلىمدى ۇلت;

• قازاقتىڭ جەتى قازىناسىنىڭ ءبىرى – قۇماي تازى;

• شەت ەلدەرمەن بىرلەسكەن جوبالار.