جاڭا جىل ءتۇنى شۆەيتساريانىڭ وڭتۇستىگىندەگى تاۋ-شاڭعى كۋرورتىندا ءىرى ءورت بولدى. ءتىلسىز جاۋ كران-مونتاناداعى Le Constellation نىسانىندا تۇتانعان, دەپ حابارلايدى Egemen.kz.
ۆالە كانتونى پوليتسياسىنىڭ شەفى فرەدەريك گيلەر وتكىزگەن ءباسپاسوز ءماسليحاتىندا سوڭعى مالىمەتتەردى جاريالادى. ونىڭ ايتۋىنشا, اپات سالدارىنان 40 ادام قازا تاۋىپ, 115 ادام ءتۇرلى دارەجەدەگى جاراقات العان.
پوليتسيا باسشىسى قازا تاپقاندار مەن اۋىر جاراقات العانداردى تانۋ (يدەنتيفيكاتسيالاۋ) جۇمىستارى ءبىراز ۋاقىتقا سوزىلاتىنىن ەسكەرتتى. قۇربانداردىڭ اراسىندا شۆەيتساريا ازاماتتارىمەن قاتار شەتەلدىك تۋريستەر دە بار.
60 ادام ۆالە كانتونىنىڭ استاناسى سون قالاسىنداعى اۋرۋحاناعا جەتكىزىلدى. قالعاندارى جەنەۆا, لوزاننا, بەرن جانە تسيۋريح قالالارىنداعى مامانداندىرىلعان كلينيكالارعا جونەلتىلگەن. كورشىلەس فرانتسيا, گەرمانيا جانە يتاليا ەلدەرى زارداپ شەككەندەردى ەمدەۋگە كومەك ۇسىنىپ وتىر.
مەملەكەت باسشىسى شۆەيتساريا پرەزيدەنتىنە كوڭىل ايتتى
ءورت جەرگىلىكتى ۋاقىت بويىنشا تۇنگى 01:30-دا باستالعان. وقيعا كۋاگەرلەرىنىڭ ايتۋىنشا, ورتكە قاراپايىم ابايسىزدىق سەبەپ بولعان. مەرەكە كەزىندە شامپان بوتەلكەسىنە سالىنعان وتشاشۋ (فەيەرۆەرك) جاعىلىپ, ول توبەگە تىم جاقىن ۇستالعان. سالدارىنان وت شاتىرعا ءتيىپ, ساناۋلى سەكۋندتار ىشىندە بۇكىل عيماراتتى شارپىپ كەتكەن.