مەملەكەت باسشىسى قاسىم-جومارت توقاەۆ: «جاس ۇرپاققا تاعىلىمدى تاربيە, ساپالى ءبىلىم بەرىپ, ولاردىڭ بويىنا اسىل قاسيەتتەردى ءسىڭىرۋ – بارشاعا ورتاق پارىز», دەگەن ەدى. وسى ورايدا جىلدار بويى وكشە باسقان بۋىندى ەلجاندىلىققا, جاۋاپكەرشىلىك پەن بەلسەندى ازاماتتىق ۇستانىمعا بەيىمدەپ, جۇيەلى جۇمىس جۇرگىزگەن ۇيىمنىڭ ءبىرى – «جاس ۇلان» بىرىڭعاي بالالار مەن جاسوسپىرىمدەر ۇيىمى» رەسپۋبليكالىق قوعامدىق بىرلەستىگى. 2011 جىلدان بەرى ميلليونداعان وقۋشىنى باسىن بىرىكتىرگەن ۇيىم باسشىسى اقنۇر تۇرداليەۆامەن اڭگىمەلەسۋدىڭ ءساتى ءتۇستى.
– اقنۇر نۇرتالاپقىزى, «جاس ۇلان» ۇيىمىنىڭ باستى ميسسياسى مەن قوعامداعى ءرولىن اشىپ ايتىپ بەرسەڭىز.
– «جاس ۇلان» ۇيىمىنىڭ باستى ميسسياسى – ۇلتتىق بولمىسى بەرىك, ەل تاعدىرىنا بەيجاي قارامايتىن, ءوز الەۋەتىن ەل يگىلىگىنە جۇمساي الاتىن ۇرپاق تاربيەلەۋ. ءبىز ءۇشىن بۇل تەك تاربيە جۇمىسى عانا ەمەس, بۇل – بولاشاققا سالىنعان ينۆەستيتسيا. بۇگىندە قاتاردا 3 ميلليوننان استام جاسۇلاندىق بار. بۇل – ەلىمىزدىڭ ءار وڭىرىندەگى بالالاردىڭ ورتاق قۇندىلىقتار توڭىرەگىندە بىرىگىپ وتىرعانىن كورسەتەدى.
پرەزيدەنت اتاپ وتكەن «ادىلەتتى قازاقستان» تۇجىرىمداماسىنداعى جاستاردىڭ بەلسەندىلىگى مەن ازاماتتىق جاۋاپكەرشىلىگىن ارتتىرۋ يدەياسى ءبىزدىڭ جۇمىسىمىزبەن تولىق ۇندەس. ءبىز بالالاردى كىشكەنتايىنان ءوز ەلىنىڭ ازاماتى رەتىندە سەزىنۋگە باۋليمىز. «جاس ۇلان» – بالانىڭ ءوزىن تابۋىنا, الەۋەتىن اشۋىنا, ارمانىنا سەنۋىنە مۇمكىندىك بەرەتىن ورتا.
– ۇيىم «بالالار ءۇشىن ەمەس, بالالارمەن بىرگە» قاعيداتىن باسشىلىققا الادى. بۇل ۇستانىم ءىس جۇزىندە قالاي جۇزەگە اسادى؟
– بۇل قاعيدات – «جاس ۇلاننىڭ» رۋحاني وزەگى. ءبىز بالالاردى تەك باقىلاۋشى نەمەسە تىڭداۋشى ەمەس, قوعامنىڭ تولىققاندى مۇشەسى رەتىندە قابىلدايمىز. ءار بالانىڭ ويى, ۇسىنىسى, باستاماسى ءبىز ءۇشىن ماڭىزدى. سوندىقتان ۇيىم قىزمەتىندە بالالاردىڭ داۋسى ەستىلۋگە ءتيىس.
مىسالى, كەيىنگى جىلدارى جۇزەگە اسقان «Fenomen Jas» جوباسى تاۋەلسىزدىك جىلدارىندا تابىسقا جەتكەن جاس قازاقستاندىقتاردى ناسيحاتتاپ, جاسوسپىرىمدەرگە شابىت بەردى. ال قارجىلىق جانە تسيفرلىق ساۋاتتىلىققا ارنالعان «Zerdeli» ۇستەل ويىنى – استانالىق بالالاردىڭ ءوز يدەياسى. مۇنداي جوبالار ارقىلى بالالار تەك قاتىسۋشى ەمەس, باستاماشى رەتىندە قالىپتاسادى. بۇل – دەموكراتيالىق مادەنيەتتىڭ, ەركىن ويلاۋدىڭ ناقتى كورىنىسى.
ۇيىمنىڭ جەتى باعىتى – تاۋەلسىز ەلدىڭ نەگىزگى قۇندىلىقتارىن بالانىڭ بويىنا جۇيەلى تۇردە ءسىڭىرۋدىڭ ناقتى تەتىگى. «وتان» باعىتى پاتريوتتىق تاربيەگە باعىتتالسا, «زەردە» ينتەللەكتۋالدى دامۋعا جول اشادى. «رۋحانيات» ۇلتتىق مادەنيەت پەن رۋحاني مۇرانى دارىپتەيدى, ال «ەكوالەم» تابيعاتقا جاۋاپكەرشىلىكپەن قاراۋدى ۇيرەتەدى. «جەتىجارعى» باعىتى ارقىلى بالالار قۇقىقتىق جانە ازاماتتىق ساۋاتىن ارتتىرادى, «سالاۋات» دەنى ساۋ ءومىر سالتىن ناسيحاتتايدى, ال «ەڭبەك» باعىتى ەرىكتىلىككە, كاسىپكەرلىككە جانە كاسىبي باعدارعا ۇندەيدى, نەگىزدەيدى. تۇپكى ماقسات – ەل بولاشاعىنا جاۋاپكەرشىلىكپەن قارايتىن, سانالى ازامات تاربيەلەۋ.
– بالالار اراسىنداعى بۋللينگ سەكىلدى ماسەلەلەردى شەشۋ باعىتىندا قانداي جۇمىس جۇرگىزىلىپ جاتىر؟
– ءبىز ءۇشىن ءار بالا – ماڭىزدى تۇلعا. كەيدە مەكتەپتە ءوز ورتاسىن تابا الماي, بۋللينگكە ۇشىراعان نەمەسە ومىرگە سەنىمى تومەندەگەن بالالار «جاس ۇلان» ارقىلى جاڭا تىنىس تابادى. ۇيىم ولار ءۇشىن قاۋىپسىز, ءوزارا تۇسىنىستىككە تولى ورتا بولا الادى.
كۇنى بۇگىنگە دەيىن ۇيىم قاتارىنا قوسىلعان ءار بالا ەرىكتىلىككە ارالاسىپ, دوستار تاۋىپ, ءوز قۇندىلىعىن قايتا سەزىنە باستادى. بۇل – ەڭ ۇلكەن جەتىستىگىمىز دەر ەدىم. سەبەبى ءجاسوسپىرىمنىڭ ساناسىنا سەلكەۋ تۇسىرمەي, بويىنداعى جارىقتى وياتۋ – كەز كەلگەن ماراپاتتان بيىك. ءبىزدىڭ كرەدو – مەيىرىم مەن قامقورلىق. ال بۇل قۇندىلىق ەلدىڭ قوعامدىق جۇيەسىن نىعايتاتىن تەتىك.
– پرەزيدەنت قاسىم-جومارت توقاەۆتىڭ باستاماسىمەن بۇۇ باس اسسامبلەياسى 2026 جىلدى تۇراقتى دامۋ ماقساتتارى اياسىنداعى حالىقارالىق ۆولونتەرلەر جىلى دەپ جاريالاۋىنا بايلانىستى, ۆولونتەرلىك قىزمەت پەن حالىقارالىق تاجىريبە الماسۋدا «جاس ۇلان» ۇيىمى قانداي ءرول اتقارادى؟
– نەگىزى ۆولونتەرلىك – جۇمىسىمىزدىڭ ماڭىزدى باعىتى. استانالىق JasUlanTeam ۆولونتەرلەر شتابى ءىرى سپورتتىق جانە مادەني ءىس-شارالارعا تۇراقتى تۇردە قاتىسادى. ولار «بارىس» حوككەي كلۋبىنىڭ ماتچتارىندا, حالىقارالىق فورۋمدار مەن فەستيۆالدەردە بەلسەندىلىك تانىتىپ كەلەدى. سونىمەن قاتار زەينەت جاسىنداعى ازاماتتارعا ارنالعان مادەني ءىس-شارالار ۇيىمداستىرىپ, ۇرپاقتار اراسىنداعى بايلانىستى نىعايتۋعا ۇلەس قوسىپ جاتىرمىز.
ال حالىقارالىق دەڭگەيدە ءبىز بالالار مەن تالىمگەرلەردىڭ كوكجيەگىن كەڭەيتۋگە ءمان بەرەمىز. جاسۇلاندىقتار ورتالىق ازيا, تۇركيا, ازەربايجان جانە تمد ەلدەرىندەگى فورۋمدار مەن ءبىلىم بەرۋ لاگەرلەرىنە قاتىسىپ, تاجىريبە الماسىپ ءجۇر. بۇل – تەك ءبىلىم الۋ ەمەس, ەلدەر اراسىنداعى دوستىق پەن مادەني بايلانىستى نىعايتۋدىڭ دا ماڭىزدى جولى.
بۇگىنگى جاس ۇلان – ەرتەڭگى ەل تىرەگى. ءبىز تاۋەلسىز قازاقستاننىڭ ەرتەڭىن سەنىمدى قولدا قالدىرۋ ءۇشىن ەڭبەك ەتەمىز. بالالاردىڭ بويىنداعى ەرىك-جىگەر, ىزدەنىس پەن شىعارماشىلىقتى دامىتا وتىرىپ, مەملەكەتتىڭ دامۋىنا سەرپىن بەرەتىن ۇرپاق تاربيەلەيمىز. «ادال ازامات» قاعيداتى ءبىزدىڭ باستى قۇندىلىعىمىز بەن ماقساتىمىز. ءار جاس ۇلاندى ادال ويلى, ءادىل مىنەزدى, مەيىرىمدى دە جاۋاپكەرشىلىكتى تۇلعا رەتىندە قالىپتاستىرۋعا ۇمتىلامىز.
– اڭگىمەڭىزگە راحمەت!
اڭگىمەلەسكەن –
زەيىن ەرعالي,
«Egemen Qazaqstan»