جاساندى ينتەللەكت جانە تسيفرلىق دامۋ مينيسترلىگى باس پروكۋراتۋرامەن بىرلەسىپ مەملەكەتتىك ونلاين-سەرۆيستەرگە كىرۋ ەرەجەلەرىن كۇشەيتتى. شارالار تەلەفون ارقىلى جاسالاتىن الاياقتىقتىڭ الدىن الۋعا باعىتتالعان, دەپ جازادى Egemen.kz.
بۇعان دەيىن بىرقاتار اقپاراتتىق جۇيەگە قول جەتكىزۋ ءۇشىن ازامات تەك تەلەفون ءنومىرىن ەنگىزىپ, 1414 قىسقا نومىرىنەن كەلگەن ءبىر رەتتىك سمس-كودتى پايدالانا الاتىن. بۇل سىزبانى قىلمىسكەرلەر ءوز پايداسىنا ءجيى قولدانعانى انىقتالعان. ولار جابىرلەنۋشىنىڭ ءنومىرىن ءبىلىپ, جۇيەگە كىرۋ ارەكەتىن باستاپ, راستاۋ كودىن ءتۇرلى تاسىلمەن قولعا ءتۇسىرىپ وتىرعان.
مينيسترلىكتىڭ مالىمەتىنشە, ەندى مۇنداي ىقشامدالعان كىرۋ فورماسى تولىقتاي ءوشىرىلدى. 2025 جىلعى جەلتوقساننان باستاپ 1414 ءشليۋزىن پايدالانعان بارلىق اقپاراتتىق جۇيەلەرگە قاۋىپسىز اۋتەنتيفيكاتسيا ادىستەرىن ەنگىزۋ مىندەتتەلدى. تالاپتى ورىنداماعان سەرۆيستەر جۇيەدەن اجىراتىلعان.
قازىرگى ۋاقىتتا 1414 ءنومىرىن قولدانعان جۇيەلەرگە كىرۋ ءۇش قاۋىپسىز ءتاسىل ارقىلى عانا مۇمكىن:
• FaceID ارقىلى بيومەتريالىق اۋتەنتيفيكاتسيا, • ەلەكتروندى تسيفرلىق قولتاڭبا (ەتسق), • ارنايى eGov QR-كودى.
بۇل وزگەرىستەر تەلەفون ءنومىرى ارقىلى رۇقساتسىز كىرۋ ىقتيمالدىعىن تولىعىمەن جويۋعا جانە ازاماتتاردىڭ جەكە دەرەكتەرىن قورعاۋعا باعىتتالعان.
مينيسترلىك حالىقتى اقپاراتتاندىرۋ شارالارىن دا جۇرگىزىپ جاتىر. eGov Mobile قوسىمشاسىندا باستى بەتكە اقپاراتتىق باننەرلەر ورنالاستىرىلعان. وندا الاياقتىق سحەمالاردى تانۋ, كيبەرقاۋىپسىزدىك ەرەجەلەرىن ساقتاۋ جانە تسيفرلىق سەرۆيستەردى دۇرىس پايدالانۋ جونىندە ۇسىنىمدار بەرىلگەن.
جۇزەگە اسىرىلىپ جاتقان بارلىق شارالار «زاڭ جانە ءتارتىپ» تۇجىرىمداماسى اياسىندا ىسكە اسىرىلادى جانە تسيفرلىق ورتاداعى قۇقىقتىق ءتارتىپتى نىعايتۋعا, سونداي-اق مەملەكەتتىك ونلاين-قىزمەتتەرگە دەگەن سەنىمدى ارتتىرۋعا باعىتتالعان.