وسىدان ءۇش-ءتورت جىل بۇرىن قورعانىس مينيسترلىگى حالىقارالىق تاجىريبەلەرگە سۇيەنە وتىرىپ, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دايىنداعانى ايتىلعان. زاڭ قابىلداندى. قازىر اباي وبلىسىندا ازاماتتاردى ءۇش جىلدىق كەلىسىمشارت نەگىزىندە رەزەرۆتىك اسكەري قىزمەتكە قابىلداۋ باستالدى.
بۇل جونىندە وڭىرلىك كوممۋنيكاتسيالار قىزمەتى الاڭىندا وتكەن ءباسپاسوز جيىنىندا «شىعىس» وڭىرلىك اسكەرلەر قولباسشىلىعى باسقارماسىنىڭ زاڭ باسقارماسى باسشىسى, پودپولكوۆنيك بەيبىت تانتساروۆ ايتىپ بەردى.
– بيىلعى 18 ناۋرىزدا قابىلدانعان «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا ەنگىزىلگەن وزگەرىستەرگە سايكەس رەزەرۆتىك اسكەري قىزمەتكە قابىلداۋ جۇمىستارى جۇرگىزىلىپ جاتىر. رەزەرۆتەگى اسكەري قىزمەتكە 18 بەن 57 جاس ارالىعىنداعى, اسكەري كۋالىگى بار, مورالدىق جانە كاسىبي تالاپتارعا ساي, سونداي-اق دەنساۋلىق جاعدايى جارامدى دەپ تانىلعان جۇمىس ىستەيتىن جانە جۇمىسسىز ازاماتتار قابىلدانادى, – دەدى باسقارماسى باسشىسى.
ونىڭ ايتۋىنشا, جاڭا فورماتتى ەنگىزۋ – قارۋلى كۇشتەردى جاساقتاۋ جۇيەسىن جەتىلدىرۋگە جانە قاجەت بولعان جاعدايدا موبيليزاتسيالىق رەسۋرستى جەدەل قالىپتاستىرۋعا مۇمكىندىك بەرەدى. ال «شىعىس» وڭىرلىك اسكەري قولباسشىلىعى باسقارماسىنىڭ كادر باستىعى, پودپولكوۆنيك باقىت جۇمابەكوۆ بۇل تۋرالى كەڭىنەن تارقاتىپ ايتتى.
– ءۇش جىلدىق كەلىسىمشارتقا وتىرعان ازاماتتار جىل سايىن 30 كۇندىك دالالىق وقۋ-جاتتىعۋلارعا, سونداي-اق اي سايىن 3 كۇندىك جاۋىنگەرلىك دايىندىق ساباقتارىنا قاتىسادى. وسىلايشا, ءاربىر رەزەرۆيست جىلىنا 60 كۇندىك دايىندىقتان وتەدى. جۇمىس ىستەيتىن رەزەرۆيستەرگە – ورتاشا ايلىق جالاقىسى, ال جۇمىسسىزدارعا ەڭ تومەنگى جالاقى تولەنەدى. دايىندىق كەزەڭىندە مەديتسينالىق قامتاماسىز ەتۋ بيۋدجەت ەسەبىنەن جۇرگىزىلەدى, – دەدى كادر باستىعى.
رەزەرۆتىك اسكەري قىزمەتكە قابىلداۋ جەرگىلىكتى اسكەري باسقارۋ ورگاندارى ارقىلى جۇزەگە اسىرىلادى.
اباي وبلىسى