پرەمەر-ءمينيستردىڭ ءبىرىنشى ورىنباسارى رومان سكليار «Amanat» پارتياسى ورتالىق اپپاراتىنىڭ قوعامدىق قابىلداۋىندا ازاماتتاردى جەكە قابىلدادى. كەزدەسۋ بارىسىندا بەلسەندىلەردەن, ەلوردا تۇرعىندارى مەن ۇكىمەتتىك ەمەس ۇيىمداردىڭ وكىلدەرىنەن بىرقاتار قوعامدىق ماڭىزدى وتىنىشتەر كەلىپ ءتۇستى.
ازاماتتار كوپ ماسەلە كوتەردى. «ۇركەر» تۇرعىن ءۇي الابىنىڭ بەلسەندىلەرى اۋلا كلۋبتارىنا رەسمي مارتەبە بەرۋ قاجەتتىگىنە نازار اۋداردى. ولاردىڭ ايتۋىنشا, مۇنداي كلۋبتار بالالاردىڭ بوس ۋاقىتىن دۇرىس ۇيىمداستىرۋدا ماڭىزدى ءرول اتقارادى. وندا ءارتۇرلى شىعارماشىلىق ساباقتار, اسپازدىق كۋرستار وتكىزىلەدى. بۇعان قوسا وتباسىمەن كەلۋگە ارنالعان باسسەينى بار زاماناۋي سپورت كەشەنىن سالۋ تۋرالى ۇسىنىس تا ايتىلدى.
«تەمەكى تۇتىنىنەن ازات قازاقستان ءۇشىن» ۇلتتىق كواليتسياسىنىڭ جەتەكشىسى جاستاردىڭ دەنساۋلىعىن قورعاۋدىڭ ءارى تەمەكىگە تاۋەلدىلىكتى تومەندەتۋدىڭ ماڭىزدىلىعىن اتاپ ءوتىپ, كاليانداردى پايدالانۋدى شەكتەۋ جونىندەگى شارالاردى قاتاڭداتۋ تۋرالى ماسەلەنى كولدەنەڭ تارتتى.
ەلوردا تۇرعىنى قوستاناي وبلىسىندا گاز قۇبىرلارىن زاڭسىز پايدالانۋ فاكتىلەرى بولۋى مۇمكىن ەكەنىن حابارلاپ, تەكسەرۋ جۇرگىزۋدى سۇرادى.
ال «Creative & Innovation Institute» ورتالىق ازيانىڭ ورنىقتى دامۋ ورتالىعى» قق ديرەكتورى اۆتورلىق ءبىلىم بەرۋ باعدارلاماسىن ەنگىزۋ باستاماسىنا توقتالدى. ونىڭ ايتۋىنشا, باعدارلاما وقۋشىلاردىڭ كرەاتيۆتى جانە تسيفرلىق ويلاۋ قابىلەتىن دامىتۋعا ارنالعان. بۇل قازىرگى تەحنولوگيالار قارىشتاپ دامىعان زاماندا ەرەكشە وزەكتى ەكەنى بەلگىلى.
سونداي-اق قاراعاندى تۇرعىنى بالالاردىڭ جان-جاقتى دامۋىنا باعىتتالعان PLATON 5D اۆتورلىق ءبىلىم بەرۋ باعدارلاماسى تۋرالى ايتىپ بەردى. «باعدارلاما پاتەنتتەلگەن جانە يۋنەسكو تالاپتارىنا سايكەس كەلەدى» دەدى ول, بىراق ونى جۇزەگە اسىرۋ ءۇشىن قوسىمشا قارجى قاجەت.
ايتىلعان بارلىق وتىنىشتەر مۇقيات قارالدى. ولاردىڭ ارقايسىسى بويىنشا ۋاكىلەتتى ورگاندار ارنايى جۇمىستار جۇرگىزەدى.
رومان سكليار پارتيانىڭ قوعامدىق قابىلداۋ بولمەسى مەملەكەتتىڭ ازاماتتارمەن ديالوگى ءۇشىن ماڭىزدى الاڭ بولىپ قالاتىنىن, بۇل قوعامدى تولعاندىراتىن ماسەلەلەرگە جەدەل دەن قويۋعا مۇمكىندىك بەرەتىنىن ايتتى.