ۇلىتاۋ وبلىسى ساتباەۆ قالاسىنىڭ تۇرعىنى مەملەكەتتىك بالاباقشادا بالالاردىڭ قىزىنا بۋللينگ جاسايتىنىن ايتىپ, شاعىمدانعان, دەپ حابارلايدى Egemen.kz.
ءبارى ءۇش جاسار اقجىبەكتىڭ بالاباقشادان شارشاپ, جىلاپ كەلۋىنەن باستالعان. ءبۇلدىرشىننىڭ اناسى قىزىنىڭ دەنەسىندەگى كوگەرگەن ىزدەردى بايقاپ, دابىل قاققان.
«قىزىمنىڭ دەنەسىندەگى كوگەرگەن ىزدەردى العاش رەت جاز ايلارىندا بايقادىم. باسىندا قاتتى ۋايىمعا سالىنباي, جاي عانا وزىم باقىلاپ ءجۇردىم. جاعداي تۇزەلگەن جوق. كەرىسىنشە ونىڭ دەنەسىندە كوگەرگەن ىزدەر تىپتەن كوبەيە ءتۇستى. تاربيەشىسىنە جازدىم. ول توپتاعى بالالار كەيدە ءوزارا شەكىسىپ قالادى دەپ جاۋاپ بەردى», دەيدى قىزدىڭ اناسى ءمادينا بۇقاربەكوۆا.
اقجىبەك جاعدايدى تولىق ايتىپ بەرە الماعاندىقتان اناسى بالاباقشادان بەينەجازبانى سۇراتقان. وندا وزگەلەردىڭ قىزعا ءتيىسىپ, يتەرىپ جىبەرگەن ساتتەرى بار. كورىنىس وزگە دە اتا-انالاردىڭ جاعاسىن ۇستاتتى. ەڭ سوراقىسى, سول جەردەگى تاربيەشى بۇلدىرشىندەردى تىنىشتاندىرۋ ءۇشىن ەش ارەكەت جاساماعان. اقجىبەكتى توپتا ءبىر ساعاتتاي جالعىز قالدىرىپ, سەرۋەنگە دە شىعارماعان. ال ءتۇس كەزىندە ونى وزگەلەردەن وقشاۋلاپ تاستاعان.
«توپتاعى تاربيەشى بالالارعا ۇنەمى قول كوتەرەدى. اتا-انالار بولىپ ديرەكتورعا باردىق. كامەراداعى جازبانى كورسەتۋدى سۇرادىق. قىزىمدى وزگەلەردەن ءبولىپ, تاڭعى تاماقتاندىرۋ كەزىندە جالعىز ءوزىن شەتكە وتىرعىزىپ قويعان. ال وزگە بالالار جۇپتاسىپ وتىر. بۇل تۋرالى ديرەكتور دا, ادىسكەر دە, تاربيەشىلەر دە بىلگەن. مەن ءبارى دە ءادىل بولسىن دەيمىن. وسى جاعدايدى بىلە تۇرا جاسىرعاندار زاڭ الدىندا ءتيىستى جاۋاپ بەرسىن», دەيدى م.بۇقاربەكوۆا.
بۇلدىرشىنگە قول كوتەرگەن قىزمەتكەر جۇمىستان شىعارىلعان. ال تاربيەشى ءوز مىندەتىنەن شەتتەتىلگەن. الايدا تەرگەۋ ءىسى جالعاسىپ جاتىر. اتا-انالاردى مازالايتىن ءبىر سۇراق بار. بالاباقشا باسشىلىعى مۇنداي جاعدايدى بۇعان دەيىن نەگە كورمەگەن؟
«بارلىعىن كورە تۇرا ەش شارا قولدانباعان تاربيەشىگە قاتىستى ىشكى قىزمەتتىك تەكسەرۋ ءجۇرىپ جاتىر. قازىرگى ۋاقىتتا ونىڭ ارەكەتىنىڭ قۇقىقتىق باعاسى بەرىلدى. بالاباقشا ديرەكتورىنىڭ بۇيرىعىمەن بارلىق جاعداي انىقتالعانشا ءوز مىندەتىنەن شەتتەتىلدى. وسىنى بىلە تۇرا ۋاقىتىلى ايتپاعان وزگە دە قىزمەتكەرلەردەن تۇسىنىكتەمەلەر الىندى. ەڭبەك زاڭدىلىعىنا سايكەس ءتيىستى تارتىپتىك شارالار الىناتىن بولادى», دەيدى ءبىلىم ءبولىمىنىڭ باس مامانى گۇلبانۋ حاسەنوۆا.
ءبىلىم ءبولىمىنىڭ ماماندارى, بالاباقشا پسيحولگتارمەن بىرلەسىپ اتا-انالارمەن سويلەسىپ, زارداپ شەككەن بۇلدىرشىنگە پسيحولوگيالىق كومەك كورسەتپەك. مەملەكەتتىك مەكتەپكە دەيىنگى ۇيىمداعى بۇل ماسەلەنى پوليتسەيلەر دە زەرتتەپ جاتىر.
«وقيعاعا قاتىسى بار تاراپتارمەن تەرگەۋ ارەكەتتەرى جۇرگىزىلىپ, بالاباقشا قىزمەتكەرلەرىنەن, اتا-انالاردان جانە كۋاگەرلەردەن وقيعا بويىنشا مالىمەتتەر جيناقتالۋدا. تەكسەرۋ ناتيجەلەرى بويىنشا وقيعاعا قۇقىقتىق باعا بەرىلىپ, زاڭدا كوزدەلگەن شارالار قابىلدانادى», دەيدى ۇلىتاۋ وبلىستىق پد ءباسپاسوز قىزمەتى.
اتا-انالار بالاباقشالاردا باقىلاۋدى كۇشەيتىپ, بەينەكامەرا سانىن ارتتىرۋدى تالاپ ەتتى. سەبەبى مەكتەپكە دەيىنگى ۇيىمداردا ولاردىڭ سانى تىم از.