ۆيتسە-پرەمەر – ۇلتتىق ەكونوميكا ءمينيسترى سەرىك جۇمانعارين ازيا دامۋ بانكىنىڭ (ادب) ورتالىق جانە باتىس ازيا بويىنشا باس ديرەكتورى لەيا گۋتەررەسپەن كەزدەستى.
ۆيتسە-پرەمەر لەيا گۋتەررەستى جىلى قارسى الىپ, بيىلعى شىلدەدە قىزمەتكە تاعايىندالۋىمەن قۇتتىقتادى. ول 1994 جىلدان بەرى جالعاسىپ كەلە جاتقان كوپجىلدىق ارىپتەستىكتىڭ ماڭىزىن اتاپ ءوتتى.
«ازيا دامۋ بانكى – ءبىز ءۇشىن ستراتەگيالىق ارىپتەس. ىنتىماقتاستىق كەزەڭىندە بانك كولىك, ەنەرگەتيكا, شوب, تسيفرلىق دامۋ, الەۋمەتتىك بىرقاتار ماڭىزدى جوبانى قارجىلاندىردى. بۇگىنگى كەزدەسۋ ارىپتەستىگىمىزدى ودان ءارى نىعايتۋعا, جاڭا پەرسپەكتيۆالىق باستامالاردى جۇزەگە اسىرۋعا ىقپال ەتەتىنىنە سەنىمدىمىز. ادب-نىڭ قازاقستان بويىنشا 2023–2027 جىلدارعا ارنالعان ەلدىك ستراتەگياسىنىڭ نەگىزگى باسىمدىقتارى ءبىزدىڭ ۇلتتىق باسىمدىققا تولىق سايكەس كەلەتىنىن اتاپ وتكىم كەلەدى. قازاقستان بۇدان ءارى دە وسى ستراتەگيانى ءتيىمدى جۇزەگە اسىرۋدى قولدايدى», دەدى ول.
ىنتىماقتاستىق ورناعان ساتتەن باستاپ ادب قازاقستانعا تەحنيكالىق كومەك پەن گرانت تۇرىندە 7 ملرد دوللاردان اسا قارىز بەردى.
ءوز تاراپىنان لەيا گۋتەررەس قازاقستاندىق تاراپقا سىندارلى ديالوگى ءۇشىن العىس ءبىلدىرىپ, ادب جارعىسىن تۇزەتۋ بويىنشا داۋىس بەرۋ كەزىندە قازاقستاندى قولداۋدىڭ ماڭىزدىلىعىنا توقتالدى. قاجەتتى داۋىس بەرۋ شەگىنە جەتۋدىڭ ناتيجەسىندە تۇزەتۋ بانكتى كرەديتتەۋدىڭ جيىنتىق كولەمىن 50%-عا – 36 ملرد دوللاردان اسىرۋعا مۇمكىندىك بەرەدى. ونىڭ ايتۋىنشا, بۇل شەشىم ادب-نىڭ دامۋشى مۇشە ەلدەردىڭ باسىم مىندەتتەرىن شەشۋدەگى كۇش-جىگەرىن قولداۋدى ەداۋىر كەڭەيتەدى.
ء«بىزدىڭ ىنتىماقتاستىعىمىزدىڭ بارىسىندا 1994 جىلدان باستاپ ادب قازاقستانعا 7 ملرد دوللاردان كوپ قاراجات بەردى. ءبىز ءداستۇرلى باعىتتا دا, جاڭا سەكتوردا دا ارىپتەستىكتى ودان ءارى ارتتىرۋعا سەنەمىز», دەدى ول.
ول سونداي-اق بيىل ادب ستراتەگيالىق ماتەريالداردىڭ قۇن تىزبەگىن قولداۋعا ارنالعان اسا ماڭىزدى مينەرالدار سالاسىنداعى جاڭا ساياساتتى جۇزەگە اسىرۋعا كىرىسكەنىن حابارلادى. بانك وسى سالادا تۇراقتى الەۋەتى بار ەلىمىزدەگى جاڭا جوبالاردى زەردەلەۋگە دايىن.
ۆيتسە-پرەمەر سونداي-اق, قازاقستان ۇكىمەتى ادب, ەادب, ەقدب جانە دۇنيەجۇزىلىك بانكتى قوسقاندا, حالىقارالىق قارجى ۇيىمدارىنىڭ ۇزدىك الەمدىك تاجىريبەسى مەن ۇسىنىمدارىن ەسكەرە وتىرىپ, ءمجا تۋرالى زاڭنامانى جەتىلدىرۋدە جۇيەلى جۇمىس جۇرگىزىپ جاتقانىن حابارلادى.
كەزدەسۋ سوڭىندا تاراپتار كولىك پەن ونەركاسىپتىك ينفراقۇرىلىمدا, تەحنولوگيادا, ەنەرگەتيكادا, سىني ماتەريالدار سالاسىندا, تۇرعىن ءۇي قۇرىلىسى مەن باسقا دا سەكتورداعى ىنتىماقتاستىقتىڭ اعىمداعى جانە پەرسپەكتيۆالىق باعىتىن تالقىلادى.