ءماجىلىس وتىرىسىندا دەپۋتات ەرلان سايروۆ گازەت-جۋرنالداردى اۋىلدارعا جەتكىزۋ تاريفتەرىنىڭ باعاسىن تۇراقتاندىرۋ جانە «قازپوشتا» مەن «قازتەلەكوم» قىزمەتكەرلەرىنىڭ جالاقىسىن كوتەرۋ جونىندە ماسەلە كوتەردى, دەپ حابارلايدى Egemen.kz.
دەپۋتاتتىڭ ايتۋىنشا, «قازپوشتا» اۋىلدارعا گازەت تاراتۋ ءتاريفىن 140 پايىزعا دەيىن قىمباتتاتقان. بۇعان دەيىن ءبىر باسىلىمدى جەتكىزۋ قۇنى 17 تەڭگە بولسا, قازىر ول 42 تەڭگەگە دەيىن وسكەن.
«وسىلاي جالعاسا بەرسە, شەكارالىق اۋدانداردا تۇراتىن 3,5 ميلليون حالىق كەلەسى جىلى «Egemen Qazaqstan», «جاس الاش», «ايقىن» سياقتى گازەتتەردى وقۋعا ماتەريالدىق شاماسى جەتپەي قالادى. بۇل جاعدايدا قازپوشتانىڭ وزىنە دە قولداۋ قاجەت. ويتكەنى بۇگىنگى تاڭدا شالعاي اۋىلدارعا اقپاراتتى دا, تولەم قىزمەتتەرىن دە جەتكىزىپ وتىرعان تەك قازپوشتا», دەدى ەرلان سايروۆ.
جاساندى ينتەللەكت جانە تسيفرلىق دامۋ ۆيتسە-ءمينيسترى دوسجان مۇساليەۆ گازەتتى تاراتۋ باعاسىنىڭ ءوسۋى ينفلياتسياعا بايلانىستى ەكەنىن اتاپ ءوتتى.
«2017 جىلى 17 تەڭگە بولىپ بەكىتىلگەن تاريف تەك بيىل كوتەرىلدى. ينفلياتسيانى ەسكەرىپ وسى باعانى 36 تەڭگەگە كوتەردىك. بۇل ينفلياتسياعا بايلانىستى» دەدى ول.