مۇگەدەكتىك توبىن بەلگىلەۋ ءۇشىن مەديتسينالىق-الەۋمەتتىك ساراپتاما جۇرگىزۋ بارىسىندا قولدانىلاتىن جاساندى ينتەللەكت (جي) مودەلىن ازىرلەۋ جۇمىسىن – ەڭبەك جانە حالىقتى الەۋمەتتىك قورعاۋ مينيسترلىگى جۇرگىزىپ جاتىر. جي ەنگىزۋ راسىمدەردىڭ اشىقتىعىن قامتاماسىز ەتىپ, سىبايلاس جەمقورلىق تاۋەكەلدەرىن بارىنشا ازايتادى, دەپ حابارلايدى Egemen.kz.
جي مەديتسينالىق قۇجاتتاردان دەرەكتەردى تانۋ جانە قۇرىلىمداۋ جۇيەسى رەتىندە پايدالانىلماق, بۇل ۇسىنىلعان مالىمەتتەردىڭ تولىقتىعىن انىقتاۋ, دياگنوزداردى ەڭبەككە قابىلەتتىلىكتەن ايىرىلۋ دارەجەسىمەن (سىرقات تۇرلەرىنىڭ حالىقارالىق جىكتەمەسىنە سايكەس) سالىستىرۋ, سونداي-اق قورىتىندى شەشىم بويىنشا ۇسىنىمدار بەرۋ سياقتى پروتسەستەردى اۆتوماتتاندىرۋعا مۇمكىندىك بەرەدى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, قازىرگى ۋاقىتتا جي مودەلىن وقىتۋ, ەلەكتروندىق قۇجاتتاردى ۇسىنۋ ءۇشىن اقپاراتتىق جۇيەلەردى ينتەگراتسيالاۋ, كلينيكالىق دياگنوزدى راستايتىن بارلىق ەمدەۋ-دياگنوستيكالىق, زەرتحانالىق جانە اسپاپتىق زەرتتەۋلەردى تسيفرلاندىرۋ جانە قۇرىلىمدالعان تۇردە بەرۋ جۇمىستارى جۇرگىزىلىپ جاتىر.
دايىندىق كەزەڭى اياقتالعاننان كەيىن كۋالاندىرۋدىڭ جاڭا فورماتىن پيلوتتىق رەجىمدە اپروباتسيالاۋ (جورامالدى دالەلدەۋ ءۇشىن تاجىريبە جۇزىندە زەرتتەۋلەر جۇرگىزۋ) جوسپارعا الىنعان.