استاناعا جۇمىس ساپارىمەن كەلگەن اۋستريا رەسپۋبليكاسى فەدەرالدى جينالىسىنىڭ ۇلتتىق كەڭەسى توراعاسىنىڭ ورىنباسارى پەتەر حاۋبنەر ماجىلىسكە كەلدى. پالاتا سپيكەرى ەرلان قوشانوۆپەن كەزدەسۋدە تاراپتار پارلامەنتارالىق بايلانىستى نىعايتۋ جولدارىن تالقىلادى, دەپ جازادى Egemen.kz.
مارتەبەلى مەيماندى قارسى العان ءماجىلىس توراعاسى ۆەنا استانانىڭ ەۋروپاداعى ماڭىزدى سەرىكتەسى ەكەنىن, ال ەكى ەلدىڭ پارلامەنتشىلەرى ساياسي ديالوگتى نىعايتۋعا بەلسەنە اتسالىسىپ جۇرگەنىن اتاپ ءوتتى.
– مەملەكەت باسشىسى قاسىم-جومارت كەمەل ۇلى توقاەۆ اۋستريامەن ءتيىمدى ءارى ءارتاراپتى ىنتىماقتاستىقتى دامىتۋعا ۇلكەن ءمان بەرەدى. وسى ورايدا, پارلامەنتتىك ديپلوماتيا جەلىسى بويىنشا اۋقىمدى جۇمىس جۇرگىزىلۋدە. بيىل قىركۇيەك ايىندا ءبىز اۋستريا ۇلتتىق كەڭەسى مەن اۋىلشارۋاشىلىق كلاستەرى دەلەگاتسياسىن قابىلدادىق. بۇگىن سىزدەرمەن جۇزدەسىپ وتىرمىز. ءبىر-ءبىرىمىزدى جاقسىراق تانۋعا جانە قارىم-قاتىناس ورناتۋعا دەگەن تالپىنىسىمىز – ەكى حالىق اراسىنداعى ساپالى ىنتىماقتاستىقتىڭ كەپىلى, – دەدى ەرلان قوشانوۆ.
ءماجىلىس سپيكەرى مەيمانعا ەلىمىزدە ءجۇرىپ جاتقان رەفورمالار مەن ەكونوميكانىڭ تۇراقتى دامۋىن قامتاماسىز ەتۋ باعىتىنداعى زاڭ شىعارۋ جۇمىسى تۋرالى ايتىپ بەردى. اتاپ ايتقاندا, جاڭا بيۋدجەت, سالىق, سۋ جانە قۇرىلىس كودەكستەرىنە, كرەاتيۆ يندۋستريالاردى دامىتۋ, جەر قويناۋىن پايدالانۋ ماسەلەلەرى جونىندەگى زاڭ جوبالارىنا جانە تاعى باسقا قۇجاتتارعا توقتالىپ ءوتتى. دەپۋتاتتاردىڭ الداعى ءۇش جىلدا قازاقستاندى تولىق تسيفرلىق مەملەكەتكە اينالدىرۋ تۋرالى پرەزيدەنت تاپسىرماسىن ىسكە اسىرۋعا قاتىستى جۇمىسىنا ەرەكشە نازار اۋدارىلدى.
ءوز كەزەگىندە پەتەر حاۋبنەر ەكى ەل اراسىنداعى بەرىك قارىم-قاتىناستىڭ كەپىلى بولاتىن پارلامەنتارالىق ديالوگتى جان-جاقتى نىعايتۋدىڭ ماڭىزدىلىعىن اتاپ ءوتتى. ول تسيفرلاندىرۋ سالاسىندا جانە وسى باعىتتاعى ەڭ وزىق جوبالاردى ەنگىزۋ بويىنشا قازاقستان مەن اۋستريا اراسىندا تاجىريبە الماسۋ مۇمكىندىكتەرى زور ەكەنىن ايتتى. سونىمەن قاتار اۋستريالىق كاسىپكەرلەر قازاقستانمەن ىنتىماقتاستىق اياسىن كەڭەيتۋگە ۇلكەن قىزىعۋشىلىق تانىتىپ وتىرعانىنا, دەپۋتاتتار ءوز تاراپىنان بۇعان ۇلكەن قولداۋ كورسەتە الاتىنىنا نازار اۋداردى.
اڭگىمە بارىسىندا تاراپتار دوستىق توپتارى, سالالىق كوميتەتتەر مەن اپپاراتتار اراسىنداعى ورتاق جۇمىستى كۇشەيتۋ جونىندە پىكىر الماستى. سونداي-اق, پارلامەنتارالىق وداق, ەقىۇ پارلامەنتتىك اسسامبلەياسى جانە ەۋروپا كەڭەسى اياسىندا ءوزارا ءىس-ارەكەتتى نىعايتۋ جولدارىن تالقىلادى.
دەپۋتاتتار ساۋدا, ماشينا جاساۋ, اۋىل شارۋاشىلىعى, كولىك-لوگيستيكا جانە باسقا دا ماسەلەلەر بويىنشا ەكى ەلدىڭ ىنتىماقتاستىعىن دامىتۋعا جان-جاقتى ىقپال ەتۋگە ۋاعدالاستى.