ەلىمىزدە 2 ملن-عا جۋىق ادام جەدەل رەسپيراتورلىق ۆيرۋستىق ينفەكتسيا جۇقتىردى. بۇل تۋرالى بۇگىن ءماجىلىستىڭ جالپى وتىرىسىنان كەيىن دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ ايتتى, دەپ جازادى Egemen.kz.
– ماۋسىمدىق ءوسىم بار. بۇگىندە شامامەن 2 ملن ادام جۇقتىردى. بۇل كۇز-قىس ماۋسىمىنداعى جاعداي. سىرقاتتانۋشىلىق وتكەن جىلعى ەپيدەميولوگيالىق ماۋسىممەن شامالاس. نەگىزگى شتامدار – ءتۇرلى جرۆي, پاراتۇماۋ. ونىڭ ىشىندە پوليمەرازدى-تىزبەكتى رەاكتسيا زەرتتەۋى بارىسىندا شامامەن 1 200 تۇماۋ شتامىن دا انىقتادىق, – دەدى ول باق وكىلدەرىنىڭ ساۋالىنا وراي.
ونىڭ ايتۋىنشا, ەلىمىزدىڭ باس سانيتارلىق دارىگەرىنىڭ ادامدار قاي جەردە بەتپەردە تاعۋعا كەڭەس بەرىلەتىندىگىنە قاتىستى ۇسىنىمى بار.
– اتالعان قاۋلىداعى بەتپەردە تاعۋ تالابى ەمحانالار مەن اۋرۋحانالاردا مەديتسينا قىزمەتكەرلەرى ءۇشىن مىندەتتى. ال باسقا قوعامدىق ورىنداردا ۇسىنىم تۇرىندە عانا, – دەدى ءبىرىنشى ۆيتسە-مينيستر.