لۋگوۆوي گارنيزونىندا قورعانىس ۆەدومستۆوسىنىڭ باسشىسى اۆياتسيا گەنەرال-لەيتەنانتى داۋرەن قوسانوۆ الدىن الا ەسكەرتۋسىز «وڭتۇستىك» وڭىرلىك قولباسشىلىعىنا قاراستى 03811 اسكەري بولىمىنە بارىپ, تەكسەرىس جۇرگىزدى, دەپ حابارلايدى Egemen.kz جامبىل وبلىسىنىڭ ءباسپاسوز قىزمەتىنە سىلتەمە جاساپ.
ول جەردە اسكەري بولىمدەگى قىزمەتتىڭ ۇيىمداستىرىلۋىن, جارعىلىق ءتارتىپتىڭ ساقتالۋىن, جاۋىنگەرلىك دايىندىقتىڭ دەڭگەيىن, كازارمالاردىڭ جاي-كۇيىن, سانيتارلىق ايماقتاردى جانە تاماقتانۋ ساپاسىن باقىلادى. ەرەكشە نازاردى تۇرمىستىق جاعدايلارعا, ساربازداردى قامتاماسىز ەتۋ ماسەلەلەرىنە جانە بولىمشەلەردەگى قولايلى مورالدىق-پسيحولوگيالىق احۋالدى قالىپتاستىرۋ جۇمىستارىنا اۋداردى.
ءمينيستردىڭ ساپارى بولىمدەگى سالتاناتتى شارامەن تۇسپا-تۇس كەلدى. وسى كۇنى مەرزىمدى قىزمەتتەگى 60 جاس جاۋىنگەر وتانعا ادال بولۋعا انت بەردى.
اۆياتسيا گەنەرال-لەيتەنانتى داۋرەن قوسانوۆ بۇل ءساتتىڭ ءاربىر قازاقستاندىق ءۇشىن ماڭىزدى ەكەنىن اتاپ ءوتتى. جاس ساربازدارعا ارناعان سوزىندە ول ولارعا جىگەر, ءمىنسىز قىزمەت جانە جاۋىنگەرلىك دايىندىقتا تابىس تىلەدى.
وسى ماڭىزدى ساتكە ورتاقتاسۋ ءۇشىن جاس ساربازداردىڭ اتا-انالارى ەلىمىزدىڭ ءتۇرلى وڭىرلەرىنەن كەلدى. ولار ءۇشىن اشىق ەسىك كۇنى ۇيىمداستىرىلىپ, اسكەري بولىمدە جاسالعان قىزمەت جانە تۇرمىس جاعدايىمەن تانىستىرىلدى. سونداي-اق ارميا مەكتەبىنەن وتكەن جاستارعا ارنالعان الەۋمەتتىك باعدارلامالار تۋرالى اقپارات بەرىلدى.
مەرەكەلىك تۇسكى اسقا قوناقتار اسكەري ءبولىمنىڭ اسحاناسىنا شاقىرىلدى. مينيستر مەن اتا-انالار دايىندالعان تاعامداردىڭ الۋان تۇرلىلىگى مەن ساپاسىن باعالادى. باستاپقىدا رەسمي سيپاتتا وتكەن اڭگىمە كەيىننەن ەركىن ءارى شىنايى اڭگىمەگە ۇلاستى. جاۋىنگەرلەر ءمينيستردىڭ ءومىربايانىنا, اسكەري جولىنا جانە ءتۇرلى گارنيزوندارداعى قىزمەت تاجىريبەسىنە قىزىعۋشىلىق تانىتتى.
ءوز كەزەگىندە جاس ساربازدار اسكەري ءبولىمنىڭ تاريحى جونىندە تەرەڭ بىلىمدەرىن كورسەتتى.
بۇگىندە 03811 اسكەري ءبولىمى «وڭتۇستىك» وڭىرلىك قولباسشىلىعى قۇرامىنداعى ەڭ وزىق بولىمدەردىڭ ءبىرى سانالادى, جاۋىنگەرلىك ەرلىك پەن اسكەري ابىروي داستۇرلەرىن لايىقتى جالعاستىرىپ كەلەدى.
اسكەري قىزمەتشىلەردىڭ اتا-انالارى مينيسترگە جانە اسكەري ءبولىم باسشىلىعىنا ۇلدارىنا جاسالعان قامقورلىق پەن ولاردىڭ قىزمەت وتكەرۋ جاعدايىن ءوز كوزدەرىمەن كورۋگە مۇمكىندىك بەرگەنى ءۇشىن ريزاشىلىقتارىن ءبىلدىردى.
ساپار قورىتىندىسى بويىنشا اۆياتسيا گەنەرال-لەيتەنانتى داۋرەن قوسانوۆ ءبولىم باسشىلىعىنا كۇندەلىكتى قىزمەتتى ۇيىمداستىرۋدى جەتىلدىرۋ, ىشكى ءتارتىپ پەن اسكەري ءتارتىپتى نىعايتۋ, تۇراقتى جاۋىنگەرلىك دايىندىق پەن قىزمەت قاۋىپسىزدىگىن قامتاماسىز ەتۋ باعىتىندا بىرقاتار ناقتى تاپسىرما بەردى.