الماتى. 24 ماۋسىم. ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ دەكانى ساعاتبەك مەدەۋبەك ۇلى باستاعان وقىتۋشىلار توبى «ەگەمەن قازاقستان» گازەتىنىڭ الماتى بولىمشەسىندە بولدى. بۇل تۋرالى egemen.kz حابارلادى.
بايلانىس جانە اقپارات قىزمەتكەرلەرى مەرەكەسى كۇنى قارساڭىندا فاكۋلتەت ۇستازدارى ەل گازەتى – «ەگەمەننىڭ» الماتى رەداكتسياسىنا ارنايى ات باسىن بۇرىپتى. جىلى شىرايلى جۇزدەسۋ بارىسىندا ۇستازدار توبى ەلىمىزدىڭ باس باسىلىمىمەن بايلانىستى بۇرىنعىدان دا نىعايتا وتىرىپ, رەداكتسياعا تاجىريبەدەن ءوتۋ ءۇشىن ستۋدەنتتەر جىبەرۋ جايىن كەڭىنەن اڭگىمەلەدى. گازەتتىڭ ينتەرنەت-رەداكتسياسىنىڭ تۇراقتى وقىرماندارىنىڭ ستۋدەنتتەر اراسىندا كوبەيگەنىن ەسكەرىپ, فاكۋلتەت پەن بولىمشە ءوزارا بولاشاق شىعارماشىلىق جوسپار قۇرىپ, جوبا جاسادى.
اڭگىمە اراسىندا رەداكتسيا ۇجىمىندا وسى فاكۋلتەتتى بىتىرگەن كەشەگى ستۋدەنتتەر قىزمەت ەتەتىنىن ەسكە سالعان ساعاتبەك مەدەۋبەك ۇلى ەگەمەندىك ارىپتەستەرىنە كەلىپ قالعان ءتول مەرەكەسىنە وراي شىعارماشىلىق تابىس تىلەپ, فاكۋلتەت اتىنان ارنايى ماراپات قاعازىن سىيلادى. وندا «تاۋەلسىز مەملەكەتىمىزدىڭ قىمبات قازىناسى – ادامنىڭ ءومىرى مەن ەركىندىگى, ۇلتارالىق تاتۋلىق پەن ساياسي تۇراقتىلىق, قارىشتى ەكونوميكا مەن قازاقستاندىق پاتريوتيزم جانە حالىقارالىق ىنتىماقتاستىقتى ناسيحاتتاۋدا وراسان زور ەڭبەك ءسىڭىرىپ كەلەسىزدەر. وزدەرىڭىز تۇلەپ ۇشقان جۋرناليستيكا فاكۋلتەتى سىزدەردى كەيىنگى تولقىنعا ۇنەمى ۇلگى» ەتەدى دەپ جازىلعان. سونداي-اق, الماتى بولىمشەسىنە ارداگەر جۋرناليست-پەداگوگ ءابىلفايىز ىدىرىسوۆتىڭ «ونەگەلى ءومىر» سەرياسىنان شىققان كىتابى سىيعا بەرىلدى.
ءوز تاراپىنان «ەگەمەن قازاقستان» رەداكتسياسى الماتى بولىمشەسىنىڭ جەتەكشىسى قورعانبەك امانجول جۋرفاكتان كەلگەن دەلەگاتسيا مۇشەلەرىنە العىس ايتتى.
تالعات ءسۇيىنباي.
دەركك, سۋرەت: egemen.kz.