الماتى قالاسىنىڭ پوليتسيا دەپارتامەنتىنىڭ مالىمەتىنشە, شىعىس باعىتتا كەلە جاتقان №69 اۆتوبۋس ايالدامادا تۇرعان №208 قوعامدىق كولىكپەن سوقتىعىسقان, دەپ حابارلايدى Egemen.kz.
جول-كولىك وقيعاسى بۇگىن ساعات 12:40 شاماسىندا رايىمبەك داڭعىلى بويىندا بولعان. سالدارىنان №69 اۆتوبۋسىنىڭ جۇرگىزۋشىسى مەن جولاۋشىسى زارداپ شەككەن.
وقيعانىڭ ءمان-جايىن مەدەۋ اۋداندىق پوليتسيا ءبولىمى تەكسەرىپ جاتىر.
6 قاراشادا پوليتسيا جىل باسىنان بەرى قالادا اۆتوبۋستاردىڭ قاتىسۋىمەن 460-تان استام جول-كولىك وقيعاسى تىركەلگەنىن, 600-دەن استام ادامنىڭ جاراقات العانىن حابارلادى. سونىمەن قاتار رەيد جۇرگىزۋ كەزىندە قۇقىق قورعاۋ ورگاندارىنىڭ قىزمەتكەرلەرى اۆتوبۋس جۇرگىزۋشىلەرى اراسىندا 2 000 جول قوزعالىسى ەرەجەلەرىنىڭ بۇزىلۋىن انىقتادى.