روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى 19 قاراشا كۇنى تالانتتى جاس ءبيشى, حالىقارالىق بايقاۋلاردىڭ لاۋرەاتى, اتى اڭىزعا اينالعان «GULDER» ءانسامبلىنىڭ ءارتىسى اققانات سماعۇلوۆانىڭ جەكە شىعارماشىلىق كەشىن وتكىزەدى. وسى ورايدا بي الەمىندە وزىندىك قولتاڭباسىن قالىپتاستىرىپ, ۇلتتىق حورەوگرافيانىڭ ابىرويىن اسقاقتاتىپ كەلە جاتقان جاس ونەرپازبەن سۇحباتتاسۋدىڭ ءساتى ءتۇستى.
– جەكە شىعارماشىلىق كەش – ءار ونەرپاز ءۇشىن ءوز جولىن باعامداپ, ونەردەگى ءورىسىن كوپشىلىككە تانىتاتىن, تۇلعالىق بولمىسىن ايشىقتايتىن ماڭىزدى بەلەس سانالادى. وسىنداي ماڭىزدى كۇنگە دايىندىعىڭىز قالاي؟
– بۇل مەنىڭ العاشقى جەكە كەشىم بولعاندىقتان, ارينە قوبالجۋ بار. باعدارلامادا ءتۇرلى باعىتتاعى بي قويىلىمدارى بولادى. ونى وتاندىق بەلگىلى بالەتمەيستەرلەر ءارى ۇستازدارىم انۆارا سادىقوۆا, المات شامشيەۆ, ونىمەن قوسا ەرنۇر قارىقبولمەن بىرلەسىپ دايىندادىق. كونتسەرتتىڭ نەگىزگى تاقىرىبى – قۇس بەينەسى. سيمۆوليكالىق ءمانى ەسىمىمە ۇندەس. ءار وبراز – مەيلى ول «اققۋ», «قارلىعاش», «قاراتورعاي» نە «تاۋىس» بولسىن وزىندىك حورەوگرافيالىق ءتىلى, مانەرى, ءستيلى مەن كوستيۋمى ارقىلى ەرەكشەلەنەدى. كەش بارىسىندا ءبىراز جاڭا قويىلىمدار كورەرمەنگە العاش رەت ۇسىنىلادى. الەم حالىقتارىنىڭ بيلەرى, كوشە ءبيى مادەنيەتىنىڭ حورەوگرافيالىق كومپوزيتسيالارى دا بولادى. جانر الۋاندىعى مەن حورەوگرافيالىق كۇردەلى قويىلىمدار كەشتىڭ باستى ەرەكشەلىكتەرىنىڭ بىرىنە اينالماق.
– كەشتە تاعى كىمدەر ونەر كورسەتەدى؟
– كونتسەرتكە ەلىمىزدىڭ تانىمال ارتىستەرى ماقسات مەدەۋبەك, ءالي وقاپوۆ, ءمادي رىمباەۆ, الىبەك الماديەۆ, ايزات قارابەك, ايدان قالجان, ۆەنەرا تابىس, ايكەرىم ەلەمەس, مەرۋەرت باقىت, «استانا سازى» قازاق مەملەكەتتىك فولكلورلىق ءانسامبلى, «Samga» كۆارتەتى, سونداي-اق ءوزىمنىڭ شىعارماشىلىق وتباسىم – «GULDER» ءانسامبلى قاتىسادى. وسىنداي كاسىبي ارىپتەستەرمەن بىرگە ساحنادا ونەر كورسەتۋ – زور مارتەبە.
كەشتىڭ يدەيا اۆتورى ءارى باس بالەتمەيستەر – انۆارا سادىقوۆا, كوركەمدىك جەتەكشىسى – ابزال وسىمباەۆ, پەداگوگ-رەپەتيتور – دانا قۋانىشبەكوۆا, كوستيۋم بويىنشا سۋرەتشى – اسەل لۇقپانوۆا, كونتسەرت رەجيسسەرى – دۋمان اكىم, جارىق بويىنشا سۋرەتشى – ەۆگەني تيحونين. بۇل كونتسەرت – ءبىزدىڭ ۇلكەن ۇجىمنىڭ بىرلەسكەن ەڭبەگىنىڭ ناتيجەسى دەسە بولادى.
وسى ورايدا دايىندىق بارىسىندا كورسەتكەن قولداۋى مەن ەڭبەگى ءۇشىن روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ باسشىلىعىنا جانە ارىپتەستەرىمە شىنايى العىسىمدى بىلدىرەمىن.
– شىعارماشىلىق جولىڭىزدى زەرتتەي وتىرىپ, گەرمانيادا وتكەن «TANZOLYMP» بەدەلدى حالىقارالىق حورەوگرافيالىق بايقاۋدا التىن مەدالگە يە بولعانىڭىزدى بايقادىم. سول ءسات تۋرالى ايتىپ وتسەڭىز.
– ءيا, گەرمانيادا وتكەن حالىقارالىق فەستيۆالدە ونەر كورسەتۋ مەن ءۇشىن ۇلكەن تاجىريبە ءارى جاۋاپكەرشىلىك بولدى. ونەر دوداسىندا انۆارا سادىقوۆا قويعان «اققۋ» جانە المات شامشيەۆ قويعان «ەركە بالا» اتتى ەكى بي ۇسىندىم. 800-دەن استام ونەرپاز باق سىناعان بۇل بايقاۋدا بار بولعانى 34 قاتىسۋشى ىرىكتەۋدەن ءوتتى. سونىڭ ءبىرى رەتىندە گالا-كونتسەرتتە ونەر كورسەتۋ باقىتى بۇيىردى. ساحناعا شىققاندا مەن قازاق ءبيى مەن مادەنيەتىن تانىستىرىپ تۇرعانىمدى سەزىندىم. ونەر كورسەتكەننەن كەيىن كورەرمەندەر كەلىپ, جىلى لەبىزدەرىن ءبىلدىرىپ, ءتىپتى بىرەۋلەردىڭ كوزىنە جاس العانىن كوردىم. سول ءسات مەن ءۇشىن ناعىز جەڭىس بولدى. سەبەبى شەتەل ساحناسىندا قازاق ونەرىن تانىتۋ – ەڭ ۇلكەن ماراپات.
– اڭگىمەڭىزگە راحمەت. ەرتەڭگى شىعارماشىلىق كەشىڭىز تىڭدارمانعا شابىت سىيلاپ, جاڭا بەلەستەرگە جول اشسىن. ونەر جولىڭىز ءاردايىم جارقىن بولعاي!
اڭگىمەلەسكەن –
زەيىن ەرعالي,
«Egemen Qazaqstan»