ماقانشى – ەلدىڭ شەتىندە, جەلدىڭ وتىندە تۇرعانىمەن, ەلىمىزدىڭ ەڭ بەرىك شەبى, تۋريستىك, ترانزيتتىك, كەدەندىك, ەكونوميكالىق ماڭىزى بار اۋدان. ءبىر كەزدەرى تاراتىلىپ كەتكەن اۋدان بۇگىندە قايتا تۇلەپ كەلەدى. پرەزيدەنت باستاماسىمەن ماقانشىنىڭ تاريحي مارتەبەسى قايتارىلىپ, تىنىس-تىرشىلىگىنە قان جۇگىرە باستادى.
مەملەكەت باسشىسى ق.توقاەۆ تۇركىستان تورىندە وتكەن ۇلتتىق قۇرىلتايدا: «ەلىمىز ءۇشىن ستراتەگيالىق ماڭىزى بار تاعى ءبىر ماسەلە – شەكارالاس ايماقتاردى دامىتۋ», دەگەن ەدى. وسى ورايدا اباي وبلىسىنداعى ماقانشى اۋدانىنىڭ ءجونى بولەك. ءوڭىردىڭ ەكونوميكالىق ءوسۋى, حالىقتىڭ تۇراقتانۋى اسا ماڭىزدى. بيىلعى 9 ايدىڭ قورىتىندىسى بويىنشا ماقانشى اۋدانىنىڭ نەگىزگى كاپيتالىنا سالىنعان ينۆەستيتسيا كولەمى وتكەن جىلدىڭ سايكەس كەزەڭىمەن سالىستىرعاندا 147,3%-عا ارتقان. بۇل ءوسىم اۋداننىڭ تۇراقتى دامۋىن, ينۆەستيتسيالىق تارتىمدىلىعىنىڭ ارتىپ كەلە جاتقانىن ايعاقتايدى. بۇل جونىندە ماقانشى اۋدانىنىڭ اكىمى داۋرەن قويگەلدين باياندادى.
– اۋداندا بىرقاتار ءىرى ينۆەستيتسيالىق جوبالار جۇزەگە اسىرىلىپ جاتىر. باقتى اۋىلىندا كولىك-لوگيستيكالىق حابتىڭ قۇرىلىسى باستالدى. «Di-Nur Company» جشس جالپى قۇنى 7 ملرد تەڭگە بولاتىن ماي ءوندىرۋ, قۇراما جەم زاۋىتىنىڭ قۇرىلىسىن جۇرگىزىپ جاتىر. سونداي-اق «Qazaq Oil», «Royal Petrol», «لۋكويل» كومپانيالارى جانار-جاعارماي قۇيۋ ستانسالارىن سالدى. بۇعان قوسا مەملەكەت باسشىسىنىڭ جولداۋىندا ايتىلعان «باقتى – اياگوز» تەمىرجولى مەن «باقتى» وتكىزۋ بەكەتىن جاڭعىرتۋ جوبالارى اۋداننىڭ كولىك-لوگيستيكالىق الەۋەتىن ارتتىرىپ, ەكونوميكالىق سەرپىن بەرەرى ءسوزسىز, – دەيدى اۋدان اكىمى.
اۋدانداعى قۇرىلىس سالاسىندا دا وڭ ناتيجە بايقالادى. پايدالانۋعا بەرىلگەن تۇرعىن ءۇي كولەمى 7 379 شارشى مەترگە جەتكەن. سونىمەن قاتار الەۋمەتتىك وسال توپتاعى ازاماتتاردى تۇرعىن ۇيمەن قامتاماسىز ەتۋ ماقساتىندا 59 جەكە ءۇيدىڭ (118 پاتەر) قۇرىلىسى جۇرگىزىلىپ جاتىر.
– جول جانە ينفراقۇرىلىم سالاسىندا دا اۋقىمدى جۇمىس اتقارىلادى. 1 ملرد 755 ملن تەڭگە قارجىعا 41 شاقىرىم جول جوندەۋ جۇمىسى جۇرگىزىلەدى. اتاپ ايتقاندا, ماقانشى, كوكتەرەك, قىزىلبۇلاق, كەلدىمۇرات, قاراتۇما, باقتى اۋىلدارىنىڭ كوشەلەرىندە ورتاشا جوندەۋ جۇمىسى قولعا الىنعان. ماقانشى اۋىلىنداعى جەڭىس ساياباعى مەن قابانباي باتىر ەسكەرتكىشى ماڭىندا دەمالىس ايماقتارى جاڭعىرتىلىپ, كوشە جارىقتاندىرۋ جۇيەلەرى ورناتىلدى. بۇل ءىس-شارالار اۋداننىڭ كەلبەتىن جاقسارتىپ, تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان, – دەيدى اۋدان اكىمى.
اكىمنىڭ مالىمەتىنشە, حالىقتىڭ كوپ دەمالاتىن ورىندارىنىڭ ءبىرى – الاكولدە جىلدان-جىلعا دەمالۋشىلار سانى ارتىپ كەلەدى. بىرنەشە جىلدان قوردالانىپ قالعان پروبلەمالاردى شەشۋ, تۋريستەرگە ساپالى قىزمەت كورسەتۋ ماقساتىندا وبلىستىق بيۋدجەتتەن جوندەۋ جۇمىستارىنا 87,1 ملن, جاعالاۋدى اباتتاندىرۋ جۇمىستارىنا 86,0 ملن, جاعالاۋعا 7 پيرس, 7 قۇتقارۋ مۇناراسىن, 5 شاقىرىم جاعالاۋعا ءتۇرلى-ءتۇستى قالقىما ورناتۋعا 37,2 ملن, جاڭادان قوعامدىق كەڭىستىك ورناتۋعا 165,8 ملن تەڭگە قارجى ءبولىنىپ, جۇمىستارى جاسالعان.
اۋدان اكىمىنەن الاكولدەگى كارىز جۇيەسىن, بارلىق اراسانىنىڭ جانىنداعى دەمالىس ساۋىقتىرۋ ورىنىنىڭ جايىن, باقتى اۋىلىنداعى اپاتتى جاعدايدا دەپ تانىلعان مەكتەپتىڭ احۋالىن سۇراپ بىلدىك. اكىم ءوز سوزىندە الاكولدەگى كارىز جۇيەسىن ورناتۋ ماسەلەسى قولعا الىنعانىن, سول سەكىلدى بارلىق اراسانىندا قايتا قالپىنا كەلتىرۋگە بايلانىستى جۇمىس ءجۇرىپ جاتقانىن ايتتى. باقتى اۋىلىنداعى مەكتەپ جوندەۋدەن وتكەن, قازىر الاڭداۋعا نەگىز جوق.
اباي وبلىسى