الماتىدا جاڭا جىل مەيرامىنا دايىندىق باستالدى. قاراشا ايىندا-اق قالانىڭ ءار اۋدانىندا كەلەسى ايدا كوشەلەر مەن اللەيالاردى بەزەندىرۋ ءۇشىن دايىندىق جۇمىستارى جۇرگىزىلىپ جاتىر, دەپ جازادى Egemen.kz.
الماتىنىڭ جاڭاجىلدىق باس شىرشاسى بۇرىنعىداي رەسپۋبليكا سارايىنىڭ جانىندا (اباي-دوستىق قيىلىسى) ورناتىلادى.
– قالانىڭ باس شىرشاسى 18 جەلتوقساندا اباي الاڭىندا جاعىلادى. سونىمەن قاتار مەدەۋ اۋدانىنداعى جاڭاجىلدىق شىرشانى جاعۋ ءراسىمى پانفيلوۆشىلار ساياباعىندا وتەدى. ناقتى كۇنى مەن ۋاقىتى كەلىسىم بويىنشا انىقتالادى, - دەپ حابارلادى الماتىنىڭ مەدەۋ اۋدانى اكىمدىگى.
مەملەكەتتىك ساتىپ الۋ ۆەب-پورتالىندا جۇرگىزىلگەن اشىق كونكۋرس ناتيجەسى بويىنشا جەڭىمپاز انىقتالىپ, مەدەۋ اۋدانى اكىمدىگى ءتيىستى قىزمەتتەردى كورسەتۋگە كەلىسىمشارت جاساسقان. مەردىگەر دەر كەزىندە انىقتالعاندىقتان, شامامەن 40 ملن تەڭگە ۇنەمدەلىپ, كەلىسىمشارتتىڭ جالپى سوماسى 160 ملن تەڭگە بولعان.
– اۋداننىڭ جاڭاجىلدىق بەزەندىرىلۋى بەكىتىلگەن جوسپارعا جانە بولىنگەن بيۋدجەت شەڭبەرىندە جۇزەگە اسىرىلادى. بۇعان دەيىن ساتىپ الىنعان اشەكەيلەر قايتا قولدانىلادى. بيىل قولدا بار دەكور ەلەمەنتتەرىن قالپىنا كەلتىرىپ, ولاردى مەرەكەلىك بەزەندىرۋ كەزىندە پايدالانۋ جوسپارلانعان, - دەپ حابارلادى مەدەۋ اۋدانى اكىمدىگى.
الماتىنىڭ تۇركسىب اۋدانى اكىمدىگىنىڭ حابارلاۋىنشا, بيىل اۋداننىڭ جاڭاجىلدىق بەزەندىرىلۋىنە جەرگىلىكتى بيۋدجەتتەن ققس-تى قوسا ەسەپتەگەندە 200 ملن تەڭگە بولىنگەن.
– قازىرگى ۋاقىتتا مەردىگەر ۇيىمدى انىقتاۋ ءۇشىن كونكۋرس ءوتىپ جاتىر. تەحنيكالىق ەرەكشەلىككە سايكەس, اۋدان اۋماعىنداعى ءتۇرلى لوكاتسيادا جاڭاجىلدىق اشەكەيلەردى مونتاجداۋ, بولشەكتەۋ جانە شىعارۋ جۇمىستارىن كونكۋرس جەڭىمپازى ورىندايدى. بىلتىرعى ماتەريالدار قايتا قولدانىلادى, - دەپ حابارلادى تۇركسىب اۋدانى اكىمدىگى.