ارنايى سەنسورلار ارقىلى كۋبيكتىڭ قىرلارىن سكانەرلەپ, تۇستەرىن انىقتايتىن روبوت الىنعان دەرەكتەردى تالداپ, ەڭ ءتيىمدى الگوريتمدى تاڭداپ, كۇردەلى لوگيكالىق تاپسىرما رەتىندە تانىلعان كۋبيك-رۋبيكتى ءدال ءارى جىلدام جينايدى, دەپ جازادى Egemen.kz.
اقىلدى روبوت جوباسىن كوپشىلىككە تانىستىرعان – استاناداعى ءالىمحان ەرمەكوۆ اتىنداعى № 38 مەكتەپ-ليتسەيىنىڭ 7-سىنىپ وقۋشىسى شاحنازار كامالوۆ.
اكىمدىكتىڭ مالىمەتىنشە, جوبا – LEGO Mindstorms EV3 كونسترۋكتورى نەگىزىندە قۇراستىرىلعان.
«باعدارلامالاۋ EV3 Classroom پلاتفورماسىندا Python تىلىندە جۇزەگە اسىرىلعان. بۇل وقۋشىعا الگوريتمدىك ويلاۋ داعدىلارىن دامىتۋعا, ينجەنەرلىك ەسەپتەردى شەشۋگە, سونداي-اق روبوت قوزعالىسىنىڭ ءار بۇرىشى مەن اينالۋىن دالدىكپەن باسقارۋعا مۇمكىندىك بەرگەن», دەلىنگەن اكىمدىك تاراتقان حابارلامادا.
روبوتوتەحنيكا – جاساندى ينتەللەكت پەن ينجەنەريا توعىسقان, قارقىندى دامىپ كەلە جاتقان ماڭىزدى باعىتتاردىڭ ءبىرى. وسىنداي جوبالار وقۋشىلاردىڭ تەحنيكالىق ساۋاتتىلىعىن ارتتىرىپ قانا قويماي, ولاردىڭ شىعارماشىلىق قابىلەتىن شىڭداپ, عىلىم مەن تەحنولوگياعا دەگەن قىزىعۋشىلىعىن كۇشەيتەدى.