ەلىمىزدە كەلەسى جىلدان باستاپ «ينۆەستيتسياعا تاپسىرىس» باعدارلاماسى ىسكە قوسىلادى

«ينۆەستيتسياعا تاپسىرىس» – حالىق اراسىندا سۇرانىسقا يە, كوبى يمپورتقا شىعارىلاتىن تاۋارلاردى ءوندىرۋ ءۇشىن شوب جانە جەكە سەكتورداعى ءىرى بيزنەستىڭ ينۆەستيتسيالىق جوبالارىن قولداۋعا ارنالعان مەملەكەتتىك جاڭا باعدارلاما. بۇل – نەگىزىنەن اوك جانە وڭدەۋ ونەركاسىبى سالاسىنىڭ تۇتىنۋ تاۋارلارى. مەملەكەت يمپورتتى الماستىرۋ جانە ەكسپورتقا تاۋار ءوندىرۋ الەۋەتى جوعارى پەرسپەكتيۆالىق سالالاردى, ال وڭىرلەر ولاردى جۇزەگە اسىرۋعا قابىلەتتى ناقتى جوبالار مەن بيزنەستى ايقىندايدى. جوبالاردىڭ تيىمدىلىگىن تالداۋ جانە ولاردى قارجىلاندىرۋ «بايتەرەك» حولدينگىنىڭ قۇرالدارى مەن تەتىكتەرى ارقىلى جۇرگىزىلمەك.

«وبلىستار مەن رەسپۋبليكالىق ماڭىزى بار قالالاردىڭ اكىمدىكتەرىمەن بىرلەسىپ, وڭىرلەردىڭ وندىرىستىك الەۋەتىنە تالداۋ جۇرگىزىلدى. اوك جوبالارى بويىنشا ينۆەستيتسيالىق پورتفەل قالىپتاستىرىلىپ, وعان جالپى قۇنى 4,3 ترلن تەڭگەنى قۇرايتىن 202 جوبا ەندى», دەدى اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى.

اوك سالاسىنىڭ «ينۆەستيتسياعا تاپسىرىس» شەڭبەرىندەگى جوبالار پۋلىنا تاۋارلى ءسۇت فەرمالارىن سالۋدى جالعاستىرۋ, ەتتى مال شارۋاشىلىعى مەن قۇس شارۋاشىلىعىن دامىتۋ, ءسۇت, ەت, تەرى جانە ءجۇن وڭدەۋ, جىلىجاي سالۋ, كوكونىس, جەمىس-جيدەك پەن كارتوپتى قايتا وڭدەۋ, قانت ونەركاسىبى مەن استىقتى تەرەڭ وڭدەۋدى دامىتۋ, بالىق وڭدەۋ كاسىپورىندارىن قۇرۋ كىرەدى. وسىلايشا, «ينۆەستيتسياعا تاپسىرىس» ناقتى جوبالارعا جانە ءاربىر سالا تيىمدىلىگىنە نازار اۋدارا وتىرىپ, ەلىمىزدىڭ يمپورتقا تاۋەلدىلىگىن تومەندەتۋ بويىنشا بۇرىنعى مەملەكەتتىك باعدارلامالاردى جۇزەگە اسىرۋدىڭ جالعاسىنا اينالادى.

اتاپ ايتقاندا, قانت يمپورتىنا تاۋەلدىلىكتى تومەندەتۋ ءۇشىن «QAZAQARAB SUGAR» جشس جانە «Asyl Farms» جشس قانت ءوندىرۋ بويىنشا 5 جوبا جوسپارلانىپ وتىر. قۇس ەتى بويىنشا – 24 جوبا ( «AITAS KZ» اق, «Eco Broiler Ltd» جشس جانە باسقالارى), شۇجىق ونىمدەرىن ءوندىرۋ بويىنشا – «ستەرح» جشس جانە «س-بولاشاق» اكك-ءتىڭ 3 جوباسى. استىقتى تەرەڭ وڭدەۋ بويىنشا «Tiryaki Holding» تۇرىك كومپانياسى استانادا استىق جانە بۇرشاق داقىلىن تەرەڭ وڭدەۋ بويىنشا ينتەگراتسيالانعان اگروونەركاسىپ كەشەنىن سالۋ جوباسىن جۇزەگە اسىرۋدا. وڭدەۋ قۋاتى – 240 مىڭ توننا بيداي مەن 80 مىڭ توننا بۇرشاق. جوبانىڭ قۇنى – $320 ملن, جۇزەگە اسىرۋ مەرزىمى – 2028 جىلعا دەيىن.

ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆ يمپورتقا تاۋەلدىلىگى جوعارى تۇتىنۋ تاۋارلارىنىڭ 26 ءتۇرىنىڭ تىزبەسىن ۇسىندى. ولاردىڭ قاتارىندا ماقتا ماتالار, مەكتەپ فورماسى, اياق كيىم, سانتەحنيكا, تۇرمىستىق تەحنيكا, كوسمەتيكا جانە گيگيەنا قۇرالدارى بار. وسى باعىتتار بويىنشا 10 مىڭعا جۋىق جۇمىس ورنىن اشا وتىرىپ, 600 ملرد تەڭگەدەن استام سوماعا 67 ينۆەستيتسيالىق جوبادان تۇراتىن پورتفەل قالىپتاستىرىلدى. نەگىزگى باستامالاردىڭ قاتارىندا تۇركىستان وبلىسىندا ماقتا ماتالار ءوندىرىسى, قىزىلوردا وبلىسىندا سانتەحنيكا, قاراعاندى وبلىسىندا جىلۋ وقشاۋلاعىش ماتەريالدار, سولتۇستىك قازاقستان وبلىسىندا دسپ جانە لدسپ ءوندىرىسى بار.

جەڭىل ونەركاسىپتى ىنتالاندىرۋ ءۇشىن سالىقتىق جەڭىلدىكتى قولدانۋ بويىنشا ۇسىنىستار تالقىلاندى. بارلىق جوبا ەكونوميكالىق ورىندىلىعى مەن ينۆەستيتسيالىق تارتىمدىلىعىن باعالاۋ ءۇشىن «بايتەرەك» حولدينگىنىڭ جەلىسى بويىنشا ساراپتامادان وتەدى. قارجىلاندىرۋ حولدينگتىڭ ەنشىلەس ۇيىمدارى جانە قاجەت بولعان جاعدايدا ەكىنشى دەڭگەيلى بانكتەر ارقىلى جۇزەگە اسىرىلادى.

ينۆەستورلاردى ىرىكتەۋ قارجىلىق تۇراقتىلىق, سالالىق تاجىريبە جانە ءوندىرىستى لوكاليزاتسيالاۋ دەڭگەيىن ەسكەرە وتىرىپ جۇرگىزىلەدى.

قورىتىندىلاي كەلە, سەرىك جۇمانعارين مەملەكەتتىك ورگاندارعا باعدارلامانى ىسكە قوسۋ ءۇشىن بارلىق ۇيىمداستىرۋشىلىق-قۇقىقتىق راسىمدەردى جىلدام اياقتاۋدى, سونداي-اق وڭىرلەرمەن جانە بيزنەسپەن بىرلەسىپ, ناقتى جوبالاردى بەلسەندى پىسىقتاۋدى تاپسىردى.

«باعدارلامانىڭ ءمانى قاراپايىم جانە تۇسىنىكتى. ءبىز جازدان باستاپ ونىڭ بارلىق باعىتىن پىسىقتاۋدامىز. قازىر پراكتيكالىق ىسكە اسىرۋ كەزەڭى ءجۇرىپ جاتىر. سولتۇستىك قازاقستان وبلىسىنىڭ تاۋارلى ءسۇت فەرمالارىن سالۋ بويىنشا تاجىريبەسىن تاراتۋ جوباسى باستالعان كەزدە كوپشىلىك كۇماندانعان بولاتىن. ال قازىر بارلىعى قارجىلاندىرۋ سۇرايدى. بىراق رەسۋرستار شەكتەۋلى – قاراجات ناقتى جۇمىس جۇرگىزىلىپ جاتقان جانە ومىرشەڭ جوبالار بار ايماقتارعا بولىنەدى», ۆيتسە-پرەمەر.