«قاراسورا – 2025» جەدەل-پروفيلاكتيكالىق ءىس-شاراسى بارىسىندا پوليتسيا قىزمەتكەرلەرى ەسىرتكى قىلمىسىن اشكەرەلەدى, دەپ حابارلايدى Egemen.kz.
«كۇيگەنجار» بەكەتىندە پوليتسەيلەر BMW كولىگىن توقتاتىپ, تەكسەرۋ جۇرگىزدى. تەكسەرۋ كەزىندە قىزمەتتىك يت – بايكال كولىك سالونىندا تىيىم سالىنعان زات بار ەكەنىن سەزىپ, بەلگى بەردى.
بار بولعانى بەس مينۋتتىڭ ىشىندە ءيتتىڭ قىراعىلىعىنىڭ ارقاسىندا پوليتسەيلەر اۆتوكولىكتەن ەسىرتكىگە ۇقساس زات – گاشيش تاركىلەدى. وقيعا ورنىندا 33 جاستاعى كۇدىكتى ازامات ەسىرتكى زاتتارىن ساقتاۋ فاكتىسى بويىنشا ۇستالدى.
اتالعان دەرەك بويىنشا سوتقا دەيىنگى تەرگەۋ امالدارى باستالدى. استانا قالاسى پوليتسيا دەپارتامەنتىنىڭ كينولوگيالىق قىزمەت ورتالىعىندا قازىرگى تاڭدا 50-دەن استام قىزمەتتىك يت بار. ولاردىڭ باسىم بولىگى ەسىرتكى مەن جارىلعىش زاتتاردى ىزدەۋگە, ءىز كەسۋگە جانە قىلمىس ىزدەرىن انىقتاۋعا بەيىمدەلگەن.
بايكال ەسىمدى يت – روتۆەيلەر تۇقىمىنا جاتادى. ول 4 جىلدان بەرى پوليتسيا قاتارىندا. نەگىزگى مىندەتى – ەسىرتكى زاتتارىن ىزدەۋ. بايكال ءيىس سەزۋدى ويىن ءتاسىلى ارقىلى ۇيرەنگەن, جانە ءوزىنىڭ دالدىگى مەن تاباندىلىعى ارقىلى بىرنەشە قىلمىستىڭ اشىلۋىنا ۇلەس قوسقان.
پوليتسيا ازاماتتاردى زاڭسىز ەسىرتكى اينالىمىنا قارسى كۇرەسكە بەيجاي قاراماۋعا, كۇدىكتى دەرەكتەر تۋرالى دەرەۋ پوليتسياعا حابارلاۋعا شاقىرادى.