استانادا ءبىر تاۋلىك ىشىندە مىڭ تەكشە مەتردەن استام قار كۇرەلدى, دەپ جازادى Egemen.kz.
استانادا كۇن سۋىتىپ, العاشقى قار جاۋعان سوڭ قالانىڭ كوممۋنالدىق قىزمەتتەرى كۇشەيتىلگەن جۇمىس تارتىبىنە كوشتى. قار كۇرەۋ جۇمىسىنا جۇزدەگەن ارنايى تەحنيكا مەن جول جۇمىسشىلارى جۇمىلدىرىلدى.
4 قاراشا كۇنى قالا اۋماعىنان مىڭ تەكشە مەتردەن استام, ياعني 86 جۇك كولىگى قار شىعارىلعان.
5 قاراشاعا قاراعان ءتۇنى قار كۇرەۋ جۇمىسىنا 374 ارنايى تەحنيكا مەن 234 جول جۇمىسشىسى قاتىسقان.
ەڭ الدىمەن نەگىزگى كوشە ماگيسترالدارى مەن قوعامدىق كولىك جۇرەتىن باعىتتار تازالانادى. كەيىن تازالاۋ جۇمىسى قوزعالىس قارقىنى ورتاشا ۋچاسكەلەردە – اۋلالاردا, الاڭداردا, تروتۋارلار مەن ايالدامالاردا جۇرگىزىلەدى.
استانا اكىمدىگى قالا تۇرعىندارى مەن قوناقتارىن قاۋىپسىزدىك ەرەجەلەرىن ساقتاۋعا, جولدار مەن جاياۋ جۇرگىنشى ايماقتارىندا بارىنشا اباي بولۋعا, سونداي-اق اۋا رايى ناشارلاعان جاعدايدا الىس جولعا شىقپاۋعا شاقىرادى.