شۆەيتساريالىق Harvest Agro كومپانياسى قازاقستاننىڭ اگروونەركاسىپتىك كەشەنىنە 700 ميلليون اقش دوللارىنان استام ينۆەستيتسيا سالماق. بۇل تۋرالى كومپانيانىڭ باس ديرەكتورى داۋلەت ۋۆاشەۆ KGIR-2025 فورۋمى اياسىندا مالىمدەدى, دەپ حابارلايدى ۇكىمەتتىڭ ءباسپاسوز قىزمەتى.
Harvest Agro 2022 جىلدان باستاپ قازاقستان نارىعىندا جۇمىس ىستەپ كەلەدى. كومپانيا جەر جانە ەلەۆاتور ساتىپ الىپ, قىزىلوردا وبلىسىندا جوبانىڭ العاشقى كەزەڭىن جۇزەگە اسىرۋعا كىرىسكەن. العاشقى كەزەڭدە 20 مىڭ گەكتار القاپتا تەحنيكالىق كەنەپ, جۇگەرى جانە سويا داقىلدارى وسىرىلەدى.
ء«بىزدىڭ ينۆەستور – شۆەيتساريا كومپانياسى. ءبىز قازاقستاندا 8–9 وبلىستا جالپى كولەمى 300 مىڭ گەكتار سۋارمالى جەردى يگەرۋدى جوسپارلاپ وتىرمىز», – دەدى داۋلەت ۋۆاشەۆ.
جوبانىڭ ەكىنشى كەزەڭى 2026 جىلدان باستالادى. بۇل كەزەڭدە الماتى, اباي, جەتىسۋ جانە شىعىس قازاقستان وبلىستارىندا اۋىل شارۋاشىلىعى ونىمدەرىن وڭدەيتىن زاۋىتتار سالىنىپ, ءار وڭىردە 50 مىڭ گەكتاردان جەر يگەرۋ كوزدەلىپ وتىر.
كومپانيا باسشىسىنىڭ ايتۋىنشا, اكىمدىكتەرمەن بىرقاتار مەموراندۋمدارعا قول قويىلىپ, بيزنەس-جوسپارلار مەن قارجىلىق مودەلدەر دايىندالعان. وندىرىلگەن ءونىمنىڭ باسىم بولىگى ىشكى نارىققا جەتكىزىلسە, ءبىر بولىگى ەكسپورتقا شىعارىلادى.
ء«بىز سويا كونتسەنتراتىن, امينقىشقىلدارىن وندىرەمىز. ال شروت پەن كۇنجارا مال ازىعىنا جۇمسالادى. تەحنيكالىق كەنەپتەن قۇرىلىس سالاسىنا ارنالعان پانەلدەر, وقشاۋلاعىش ماتەريالدار مەن پليتالار شىعارامىز. وسىلايشا, تەرەڭ وڭدەۋدى جولعا قويىپ, ىشكى جانە سىرتقى نارىققا دايىن ءونىم ۇسىناتىن بولامىز», – دەپ اتاپ ءوتتى داۋلەت ۋۆاشەۆ.