ريمدەگى ۆيللا گراتسيولي ساياباعىندا (Parco di Villa Grazioli) قازاق حالقىنىڭ ۇلى اقىنى ءارى ويشىلى اباي قۇنانباي ۇلى ءبيۋستىنىڭ سالتاناتتى اشىلۋى ءوتتى. ءىس-شاراعا مادەنيەت جانە اقپارات ءمينيسترى ايدا بالاەۆا, قازاقستان رەسپۋبليكاسىنىڭ يتاليا رەسپۋبليكاسىنداعى توتەنشە جانە وكىلەتتى ەلشىسى ەربولات سەمباەۆ, يتاليالىق زيالى قاۋىم وكىلدەرى مەن قازاقستاننىڭ رەسمي دەلەگاتسياسى مۇشەلەرى قاتىستى.
سالتاناتتى ءىس-شاراداعى سوزىندە مينيستر اباي قۇنانباي ۇلى – قازاق حالقىنىڭ رۋحاني كەمەلدەنۋىنە باعدار بولعان, ادامزاتتىڭ اسىل مۇراتتارىن ناسيحاتتاعان ۇلى تۇلعا ەكەنىن, ونىڭ شىعارمالارى ادامزاتتى ادامگەرشىلىك, ادىلدىك, ءبىلىم مەن ەڭبەك ارقىلى ىزگىلىككە ۇندەيتىنىن اتاپ ءوتتى. سوندىقتان دا اباي ءبيۋستىنىڭ ءدال ريم قالاسىندا بوي كوتەرۋى – مادەنيەتتەر مەن وركەنيەتتەر اراسىنداعى رۋحاني كوپىردىڭ بەلگىسى بولارى انىق.
«كەيىنگى جىلدارى مەملەكەتتەرىمىز اراسىنداعى قارىم-قاتىناس ەرەكشە سەرپىن الدى. وتكەن جىلى قازاقستان رەسپۋبليكاسى پرەزيدەنتىنىڭ يتالياعا رەسمي ساپارى مەن يتاليا مينيسترلەر كەڭەسى ءتورايىمىنىڭ قازاقستانعا جاساعان رەسمي ساپارى ىنتىماقتاستىقتى جاڭا دەڭگەيگە كوتەردى.
قىركۇيەك ايىندا يتاليا پرەزيدەنتى قازاقستانعا كەلىپ, جاڭا بايلانىستارعا جول اشىپ, بىرقاتار ماڭىزدى كەلىسسوز جاسالدى. بۇگىنگى اباي ەسكەرتكىشىنىڭ اشىلۋى – سول كەلىسىمدەردىڭ كورىنىسى, ەكى حالىق اراسىنداعى دوستىق پەن ءوزارا قۇرمەتتىڭ بەلگىسى دەپ بىلەمىن», دەدى ا.بالاەۆا.
ايتا كەتسەك, قازاقتىڭ ۇلى اقىنى ابايدىڭ ەسىمى شەتەلدە زور قۇرمەتكە يە. اقىنعا ارنالعان ەسكەرتكىشتەر, بيۋستەر مەن مونۋمەنتتەر الەمنىڭ كوپتەگەن ءىرى قالاسى مەن استاناسىندا ورناتىلعان. ولاردىڭ قاتارىندا, تاشكەنت, ماسكەۋ, قازان, بىشكەك, بەيجىڭ, كاير, بۋداپەشت, تەھران, انكارا, ىستانبۇل, نيۋ-دەلي, جەنەۆا, پاريج, رەنن, ساراەۆو, تبيليسي, بەرلين, سەۋل, حاركوۆ, باكۋ, ريو-دە-جانەيرو قالاسى بار.
وسى ءىس-شارادان سوڭ ايدا بالاەۆا مەن ەربولات سەمباەۆ يتالياداعى شىڭعىس ايتماتوۆ ەسكەرتكىشىنە دە گۇل شوقتارىن قويدى.