تۇركيانىڭ كودجاەلي پروۆينتسياسىنداعى گەبزە قالاسىندا جەتى قاباتتى تۇرعىن ءۇي وپىرىلىپ ءتۇستى. ىشكى ىستەر مينيسترلىگىنىڭ مالىمەتىنشە, ءۇيدىڭ استىندا ادامدار قالۋى مۇمكىن. قازىرگى ۋاقىتتا ىزدەستىرۋ-قۇتقارۋ جۇمىستارى قارقىندى جۇرگىزىل3پ جاتىر, دەپ حابارلايدى Egemen.kz.
ازىرگە قازا تاپقاندار مەن زارداپ شەككەندەر تۋرالى ناقتى اقپارات جوق.
وقيعا ورنىنا پوليتسيا, ءورت ءسوندىرۋ قىزمەتى, توتەنشە جاعدايلار جونىندەگى باسقارما (AFAD), مەديتسينالىق قىزمەتتەر مەن ەرىكتىلەر شۇعىل تۇردە جەتكىزىلگەن.
قۇتقارۋ جۇمىستارىنا ەكى كينولوگيالىق توپ, ادامداردى انىقتايتىن سەگىز قۇرىلعى, ەكى درون جانە 52 تەحنيكا جۇمىلدىرىلعان. بارلىعى 147 ادام, ونىڭ ىشىندە 80 AFAD مامانى, جەرگىلىكتى اكىمدىك پەن ۇكىمەتتىك ەمەس ۇيىمداردىڭ وكىلدەرى ىزدەستىرۋ-قۇتقارۋ جۇمىستارىنا قاتىسىپ جاتىر.
تۇركيانىڭ ىشكى ىستەر ءمينيسترى الي يەرليكايانىڭ ايتۋىنشا, وقيعا ورنىندا بەس ازاماتتىڭ ءۇيىندى استىندا قالۋى مۇمكىن.
«قۇتقارۋ جۇمىستارى جەرگىلىكتى بيلىكتىڭ ۇيلەستىرۋىمەن قارقىندى ءجۇرىپ جاتىر. بىرقاتار مينيسترلىك پەن ۆەدومستۆو باسشىلارى وقيعا ورنىنا جەتتى», دەدى مينيستر.
جەرگىلىكتى بيلىك تۇرعىنداردى قۇلاعان عيمارات ماڭىنا بارماۋعا شاقىرىپ, قۇتقارۋشىلاردىڭ جۇمىسىنا كەدەرگى كەلتىرمەۋدى ءوتىندى.