قر توتەنشە جاعدايلار مينيسترلىگىنە قاراستى «سەيسمولوگيالىق تاجىريبەلىك-ادىستەمەلىك ەكسپەديتسيا» جشس سەيسميكالىق ستانتسيالار جەلىسىنىڭ دەرەكتەرى بويىنشا, 23 قازان كۇنى استانا ۋاقىتىمەن ساعات 12:20-دە قىرعىزستان اۋماعىندا جەر سىلكىنىسى بولدى, دەپ حابارلايدى Egemen.kz.
ءزىلزالانىڭ وشاعى الماتى قالاسىنان وڭتۇستىك-باتىسقا قاراي شامامەن 136 شاقىرىم قاشىقتىقتا انىقتالعان.
ماگنيتۋداسى 4,9 باللدى قۇرادى. الدىن الا مالىمەتتەرگە سايكەس, MSK-64 شكالاسى بويىنشا الماتىدا جەر ءدۇمپۋى سەزىلمەگەن.
توتەنشە جاعدايلار مينيسترلىگىنىڭ مالىمدەۋىنشە, قازىرگى ۋاقىتتا وڭىردەگى سەيسميكالىق جاعداي تۇراقتى. قالانىڭ ينفراقۇرىلىمىنا جانە تۇرعىندارعا ەشقانداي قاۋىپ تونگەن جوق. ماماندار جاعدايدى باقىلاۋدا ۇستاپ وتىر.