البانيانىڭ دۋررەس قالاسىندا جاسوسپىرىمدەر اراسىندا الەم چەمپيوناتى ءوتتى. ەلىمىزدىڭ جاس شاحماتشىلارى ءدۇبىرلى دودادان ولجالى ورالدى.
چەمپيوناتقا 84 ەلدەن 711 شاحماتشى جينالدى. ەل ءۇمىتىن ارقالاپ بارعان 44 سپورتشى 14, 16, 18 جاسقا دەيىنگىلەر اراسىندا تارتىسقا ءتۇستى. جارىس شۆەيتساريالىق جۇيەمەن ءوربىپ, قاتىسۋشىلار 11 تۋردا باعىن سىنادى.
جەرلەستەرىمىز مارك سميرنوۆ پەن ەدگار مامەدوۆ التىن مەدال ولجالاسا, ساۋات نۇرعاليەۆ كۇمىس جۇلدە يەلەندى. 13 جاسار م.سميرنوۆ مۇمكىن بولعان 11 ۇپايدان 9½ جيناپ 14 جاسقا دەيىنگى (O14) جاسوسپىرىمدەر اراسىندا توپ جاردى. ءوز توبىنداعى كوشباسشى سانالعان قىتايلىق تسزيان حاوچەندى (8½ ۇپاي) شاڭ قاپتىرىپ, سوڭعى تۋردا پولشا ەلىنىڭ سەنىمىن ارقالاپ كەلگەن پەتر بجەزيندى ايقىن ۇتتى. مارك 2023 جىلى يتاليادا وتكەن الەم چەمپيوناتىندا 12 جاس ساناتىندا سىنعا ءتۇسىپ, 9 پارتيادا جەڭىسكە جەتىپ, 2 قارسىلاسىمەن تەڭ ءتۇسىپ, جاھان ۇزدىگى بولىپ تانىلعان ەدى. اراعا ەكى جىل سالىپ سول جەتىستىگىن تاعى دا قايتالاپ, حالىقارالىق دارەجەدەگى سپورت شەبەرى اتاندى.
15 جاستاعى ەدگار مامەدوۆ 11 تۋردان 8 ۇپاي جيناپ, 16 جاسقا دەيىنگى (O16) جاسوسپىرىمدەر اراسىندا التىن مەدال ەنشىلەدى. ساۋات نۇرعاليەۆ ۇندىستاندىق ۆازا ەتانمەن تەڭ ۇپاي جيناپ, كۇمىس مەدال يەلەندى.
14 جاسقا دەيىنگى (O14) جاسوسپىرىمدەر ساناتىندا اقىلجان مەيىرحان ۇلى 9-ورىنعا, 18 جاسقا دەيىنگى (O18) بوزبالالار اراسىندا الديار اڭسات 8, دانيال ساپەنوۆ 19-ورىنعا جايعاستى.
قىزدار سايىسىندا 14 جاس ساناتىندا (G14) باق سىناعان ماريا حولياۆكو – 8, حانزادا امانجول – 14, اقنۇر ماماقوۆا 17-ورىندى مىسە تۇتتى. 16 جاسقا دەيىنگى (G16) قىزداردىڭ تارتىسىندا زارينا نۇرعاليەۆا – 8, ەلناز قالياحمەت 15-ورىنعا تۇراقتادى.