ەلوردادا كۇزگى اسكەرگە شاقىرۋ ناۋقانى ءجۇرىپ جاتىر. قىركۇيەكتە شەكارا قىزمەتى مەن دەسانتتىق بولىمدەر جاساقتالعان ەدى. ال قازىر مەحانيكالاندىرىلعان, ارنايى جاساق جانە بارلاۋ بولىمدەرى, ارتيللەريالىق قۇرامالار تولىقتىرىلىپ جاتىر. وسىعان وراي قالالىق شاقىرۋ كوميسسياسىنىڭ وتىرىسى ءوتتى, دەپ جازادى Egemen.kz.
جيىنعا زاپاستاعى پولكوۆنيك, «قازاقستان قارۋلى كۇشتەرى ارداگەرلەرى» رەسپۋبليكالىق قوعامدىق بىرلەستىگىنىڭ وكىلى عاني ارتىقوۆ پەن بلوگەر ءارى جاتتىقتىرۋشى ايتىم جاقىپوۆ قاتىستى. ولار جاستاردى اسكەرگە جاۋاپكەرشىلىكپەن قاراۋعا شاقىردى.
ايتىم جاقىپوۆتىڭ ايتۋىنشا, اسكەر – ءار جىگىت ءوتۋى ءتيىس ءومىر مەكتەبى. ول جاستارعا بۇل كەزەڭگە سانالى تۇردە دايىندالۋ قاجەتتىگىن ەسكەرتتى, اسىرەسە فيزيكالىق دايىندىقتىڭ ماڭىزدىلىعىنا توقتالدى.
«ەلىمىزدە دايىندالۋعا بارلىق مۇمكىندىك بار: فيتنەس ورتالىقتار, سپورت كەشەندەرى, كلۋبتار جۇمىس ىستەيدى. ەڭ باستىسى – شاقىرۋ قاعازىن كۇتپەي, سپورتپەن شۇعىلدانۋدى ەرتەرەك باستاۋ كەرەك. فيزيكالىق فورما – جەكە دەنساۋلىقپەن قاتار, ەل قاۋىپسىزدىگىنە قوسقان ۇلەس. بارلىق بولاشاق ساربازدارعا جاتتىعۋعا كىرىسىپ, اسكەرگە دايىن بولۋعا كەڭەس بەرەمىن. مەنىڭ جوباما قاتىسقان جاستاردىڭ 90%-ى ءومىرىن تۇبەگەيلى وزگەرتتى. كوپشىلىگى مارافونشى, جاتتىقتىرۋشى, تالىمگەر اتاندى. كەيبىرى 50-200 كەلىگە دەيىن سالماق تاستادى. بۇل تەك سىرتقى وزگەرىس ەمەس, مىنەزدىڭ قالىپتاسۋى. مۇنداي ادامدار شىن مانىندە ءتارتىپتى جانە فيزيكالىق تۇرعىدان دايىن. ال بۇل اسكەرگە قاجەتتى باستى قاسيەت. قازىرگى ءبىر ورىندا ۇزاق وتىرۋ ءومىر سالتى جاس بۋىننىڭ دەنە بەلسەندىلىگىن تومەندەتىپ, زات الماسۋعا, جالپى دەنساۋلىققا كەرى اسەرىن تيگىزىپ وتىر. ارميا وسىنىڭ ورنىن تولتىرىپ, نەگىزگى داعدىلاردى قايتا قالىپتاستىرۋعا مۇمكىندىك بەرەدى. اسكەر – بۇل ابىروي ءۇشىن ەمەس, وتان الدىنداعى بورىش. ەگەر سارباز ءوزىن جاقسى قىرىنان كورسەتسە, ول جوعارى وقۋ ورنىندا ءبىلىمىن جالعاستىرىپ, كاسىبي جولىن قورعانىس مينيسترلىگىمەن بىرگە جوسپارلاي الادى. بۇل – الەۋمەتتىك ليفت», دەيدى ول.
ال عاني ارتىقوۆتىڭ ايتۋىنشا, قازىر ەلوردادا شاقىرۋ ناۋقانىنىڭ بەلسەندى كەزەڭى ءوتىپ جاتىر. ول ءۇشىن ازاماتتار الدىمەن مەديتسينالىق كوميسسيادان وتەدى. وندا ولاردىڭ دەنساۋلىعى ءجىتى تەكسەرىلەدى. تەك تولىق جارامدى دەپ تانىلعاندار عانا اسكەر تۇرلەرىنە جىبەرىلەدى.
«ماسەلەن, دەسانتتىق-شابۋىل جانە ارنايى بولىمدەرگە بويى 170 سم-دەن جوعارى, دەنساۋلىعى مەن سپورتتىق دايىندىعى مىقتى جىگىتتەر ىرىكتەلەدى. جاقسى جۇزەتىندەر – اسكەري-تەڭىز كۇشتەرىنە قابىلدانادى. جوعارى ءبىلىمى بار ماتەماتيكتەر مەن IT-ماماندار اۋە شابۋىلىنا قارسى قورعانىس بولىمدەرىندە جۇمىس ىستەپ, زەنيتتىك جۇيەلەر مەن رادارلاردى باسقارادى. باعدارلاماشىلار مەن ينجەنەرلەر عىلىمي بولىمشەلەرگە ءبولىنىپ, باعدارلامالىق قامتاماسىز ەتۋ مەن اقپاراتتىق جۇيەلەردى دامىتادى. زاڭ فاكۋلتەتتەرىنىڭ تۇلەكتەرى كوبىنە ۇلتتىق ۇلان قاتارىنا قابىلدانادى, سەبەبى بۇل قۇرىلىم قۇقىق قورعاۋ سالاسىنا كادر دايىندايتىن نەگىزگى بازا سانالادى», دەيدى «قازاقستان قارۋلى كۇشتەرى ارداگەرلەرى» رەسپۋبليكالىق قوعامدىق بىرلەستىگىنىڭ وكىلى.
ايتا كەتەيىك قاراشانىڭ اياعىنا دەيىن ۇلتتىق ۇلان مەن تجم قۇتقارۋ بولىمدەرىنە اسكەرگە الۋ جالعاسادى. بۇل قۇرىلىمدارعا ۇمىتكەرلەرگە قويىلاتىن تالاپتار دا جوعارى – دەنە دايىندىعى مەن كاسىبي قابىلەتى قاتاڭ باعالانادى. جالپى, بيىل ەلوردادان 1 200-دەن استام جاس سارباز اسكەرگە جونەلتىلەدى.