الماتى قالاسىندا جابايى بازارلاردىڭ داۋرەنى ءبىتىپ, ءداۋىرى اياقتالىپ كەلەدى. بۇگىندە مەگاپوليستە زاماناۋي دا جايلى فورماتتاعى بازارلارعا كوشۋ كەزەڭى جەدەل ءجۇرىپ جاتىر, دەپ جازادى Egemen.kz.
ء«بىزدىڭ ماقساتىمىز – بازارلاردى قايتا سالۋ عانا ەمەس, قاۋىپسىز ءارى قولايلى ساۋدا كەڭىستىگىن قالىپتاستىرۋ. مۇندا بيزنەس دامىپ, قالا تۇرعىندارى ءوزىن جايلى سەزىنۋى ءتيىس. بۇل ساتىپ الۋشىلاردى, كاسىپكەرلەر مەن قالانىڭ ءوزىن قورعاۋعا باعىتتالعان «ساۋدا قىزمەتىن رەتتەۋ تۋرالى» قر زاڭىنىڭ تالابىنپ نەگىزدەلگەن», – دەيدى الماتى اكىمىنىڭ ورىنباسارى ولجاس سماعۇلوۆ.
بۇگىندە الماتىدا 29 بازار تولىقتاي جاڭعىرتىلىپ, ولاردىڭ اۋماعىندا ءىرى قۇرىلىستار سالىندى, ينجەنەرلىك ينفراقۇرىلىم جاڭارتىلدى. وعان قوسا تاعى 21 بازار جاڭعىرتىلىپ جاتسا, بۇل جۇمىستار 2026 جىلدىڭ سوڭىنا دەيىن اياقتالادى. ەسكىرگەن «جىبەك جولى» بازارىنىڭ ورنىنا جاڭا مەنشىك يەسى وسى زامانعى تۇرعىن ءۇي كەشەنى مەن ساۋدا ورتالىعىن سالعالى وتىر.
جالپى, سوڭعى جىلدارى قالاداعى بازارلاردىڭ سانى كەيبىرەۋلەرىنىڭ ورنىنا ساۋدا ورتالىقتارى بوي كوتەرگەندىكتەن, 59-دان 51-گە دەيىن ازايدى.
دەگەنمەن اكىمدىك كاسىپكەرلەردىڭ نەگە الاڭدايتىنىن تۇسىنەدى. جالعا الۋ باعاسىنىڭ قىمباتتاي ءتۇسۋى پايدانى ارتتىرۋ ماقساتىندا ەمەس, قايتا جاڭعىرتۋدان كەيىنگى پايدالانۋ مەن كوممۋنالدىق شىعىنداردىڭ كوبەيۋىنە بايلانىستى تۋىنداپ وتىر. سەبەبى جاڭارتىلعان بازارلار ورتالىقتاندىرىلعان جىلۋ, سۋ, كارىز جۇيەلەرىنە قوسىلادى, سانيتارلىق تالاپتار مەن اباتتاندىرىلعان اۋماق قامتاماسىز ەتىلەدى. رەكونسترۋكتسيا كەزەڭىندە جالعا الۋشىلارعا ساۋدا ورىندارى ۋاقىتشا جەڭىلدىكپەن بەرىلەدى.
وسى ارادا قر اكىمشىلىك قۇقىق بۇزۋشىلىق تۋرالى كودەكسىنىڭ 204-2-بابىنا سايكەس, بازارلاردى مودەرنيزاتسيالاماۋ اكىمشىلىك جاۋاپكەرشىلىك جۇكتەيتىنىن ايتا كەتۋ كەرەك. 2026 جىلعى 1 قاڭتاردان باستاپ تالاپتاردى ورىنداماعان بازارلاردىڭ قىزمەتى ۋاقىتشا توقتاتىلادى.