سەنات دەپۋتاتتارى جانە اپپارات قىزمەتكەرلەرى مەملەكەت باسشىسىنىڭ باستاماسىمەن ىسكە اسىرىلىپ كەلە جاتقان «تازا قازاقستان» جالپىۇلتتىق ەكولوگيالىق اكتسياسى اياسىندا قالالىق سەنبىلىككە قاتىستى. ءىس-شاراعا ءدىني بىرلەستىكتەر وكىلدەرى, كونفەسسياارالىق جانە دىنارالىق ديالوگتىڭ حالىقارالىق ورتالىعىنىڭ قىزمەتكەرلەرى, سەنات جانىنداعى ساراپشىلار كلۋبى مەن تالداۋ مەكتەبىنىڭ تۇلەكتەرىن بىرىكتىرەتىن «Taldau Community»-ءدىڭ مۇشەلەرى دە ۇلەس قوستى.
سەناتورلار قاتىسقان «تازا قازاقستان» ەكولوگيالىق اكتسياسى بۇل جولى بەيبىتشىلىك جانە كەلىسىم ساياباعىندا ءوتتى. ول الەمدىك جانە ءداستۇرلى دىندەر كوشباسشىلارىنىڭ سەزى اياسىندا اشىلعان جاڭا بىرەگەي ورىن ەكەنىن اتاپ وتكەن ءجون. ءدال وسى جەردە ءۇش جىل بۇرىن, ياعني 2022 جىلى ريم پاپاسى فرانتسيسك, ءال-ازھاردىڭ جوعارعى يمامى شەيح احمەد ات-تايەب جانە باسقا دا الەمدىك دىندەردىڭ ليدەرلەرى ساياباقتىڭ نەگىزىن قالاپ, اعاش وتىرعىزعان ەدى. بيىل الەمدىك جانە ءداستۇرلى دىندەر كوشباسشىلارىنىڭ VIII سەزى كەزىندە اتالعان ورىن رەسمي تۇردە اشىلىپ, دىندەر مەن مادەنيەتتەر اراسىنداعى رۋحاني كوپىردىڭ جارقىن رامىزىنە اينالدى.
ءىس-شارا بارىسىندا «تازا قازاقستان» اكتسياسى تەك ەكولوگيالىق ەمەس, سونداي-اق رۋحاني تازالىققا جانە ىزگى نيەتكە شاقىراتىن باستاما ەكەنى ايتىلدى. وسى ورايدا سەنبىلىكتىڭ بەيبىتشىلىك جانە كەلىسىم ساياباعىندا وتكىزىلۋىنىڭ سيمۆوليكالىق مانىنە دە نازار اۋدارىلدى.
سەنات توراعاسى «تازا قازاقستان» جالپىۇلتتىق اكتسياسى ازاماتتاردىڭ دەنساۋلىعى, بولاشاق ۇرپاقتىڭ يگىلىگى جانە ەلدىڭ ورنىقتى دامۋى جولىندا ايرىقشا ماڭىزعا يە ەكەنىنە توقتالدى. سونداي-اق ول مەملەكەت باسشىسى قوعامدا ەكولوگيالىق مادەنيەت قالىپتاستىرۋعا جانە تابيعاتقا جاۋاپكەرشىلىكپەن قاراۋ قاعيداتتارىن دارىپتەۋگە ۇنەمى باسا ءمان بەرىپ كەلە جاتقانىن اتاپ ءوتتى. ماۋلەن اشىمباەۆ بۇل قاعيداتتار قازاقستاندىقتاردىڭ جاسامپاز قۇندىلىقتارىنىڭ كورىنىسى ەكەنىن دە تىلگە تيەك ەتتى.
«پرەزيدەنتىمىز ءوزىنىڭ جولداۋىندا قورشاعان ورتاعا جاناشىر بولۋ, وعان ۇلكەن جاۋاپكەرشىلىكپەن قاراۋ ۇلتتىق يدەولوگيانىڭ وزەگىنە اينالۋى كەرەك ەكەنىن ايتتى. مەملەكەت باسشىسى وسىعان بايلانىستى تازالىق مادەنيەتىن قوعامدا تەرەڭ ورنىقتىرۋ ءۇشىن ەكولوگيالىق اعارتۋ ءىسىنىڭ بىرىڭعاي ۇلگىسىن ەنگىزۋدى تاپسىردى. جالپى, كەيىنگى جىلدارى پرەزيدەنتتىڭ باستاماسىمەن ەلىمىزدە تازالىقتى دارىپتەۋگە, قورشاعان ورتانى قورعاۋعا, ەكولوگياعا جاناشىرلىقپەن قاراۋعا ۇلكەن كوڭىل ءبولىنىپ جاتىر. «تازا قازاقستان» – ءداستۇرلى جالپىۇلتتىق اكتسياسى وسى باعىتتاعى اۋقىمدى جۇمىستىڭ جارقىن كورىنىسى», دەپ م.اشىمباەۆ اكتسياعا قاتىسقان ازاماتتارعا العىس ءبىلدىردى.
جالپى, اتالعان سەنبىلىككە 200-گە جۋىق ادام قاتىسقانىن ايتا كەتكەن ءجون. ولار 100-دەن اسا اعاش وتىرعىزدى. سەناتورلار «تازا قازاقستان» ەكولوگيالىق اكتسياسىن قولعا الىنعان جىلدان بەرى بەلسەندى قولداپ كەلە جاتقاندارىن تىلگە تيەك ەتىپ, بۇل قورشاعان ورتاعا قامقورلىقپەن قاراۋدى ادەتكە اينالدىراتىن جانە قالانى كوگالداندىرۋدى دارىپتەيتىن, تۇرعىندار ءۇشىن جايلى ورتا قالىپتاستىراتىن ماڭىزدى باستاما ەكەنىنە نازار اۋداردى.