موڭعوليانىڭ بايان-ولگەي ايماعىندا ءداستۇرلى «بۇركىتشىلەر تويى» اياسىندا ءىىى ازيا چەمپيوناتى ءوتتى. بايراقتى باسەكەدە قازاق ەلىنىڭ قۇسبەگىلىك سپورتىنىڭ ۇلتتىق قۇراماسى جوعارى ناتيجە كورسەتىپ, جۇلدەلى ورىنداردان كورىندى.
36 جىلدىق تاريحى بار حالىقارالىق دودا كوشپەلى حالىقتاردىڭ مادەني برەندىنە اينالعان دەسە دە بولادى. جىل سايىن الەمنىڭ تۇكپىر-تۇكپىرىنەن مىڭداعان تۋريست پەن بۇركىتشى قاتىساتىن ەرەكشە مەرەكەگە ەلىمىزدىڭ قۇسبەگىلەرىن مەملەكەتتىك جاتتىقتىرۋشىلار ارمانبەك پەن بازاربەك كۇنتۋعاندار باستاپ باردى.
چەمپيوناتقا 60-تان استام قۇسبەگى قاتىسىپ, «قولعا شاقىرۋ» جانە «شىرعا تارتۋ» سايىستارى بويىنشا سىنعا ءتۇستى. قازاقستان ۇلتتىق قۇراماسى ساپىندا ەل نامىسىن قورعاعان اباي وبلىسىنىڭ بۇركىتشىسى تاتتىمبەت كاپ ۇلى «قاراگەر» اتتى قىران قۇسىمەن جۇلدەلى ءۇشىنشى ورىندى, ال اتىراۋلىق قۇسبەگى ارمان قوشقاروۆ «اڭىراقاي» اتتى بۇركىتىمەن ەكىنشى ورىندى يەلەنىپ, ەل ابىرويىن اسقاقتاتتى.
اباي وبلىسى