الماتى وبلىسىنىڭ ىلە اۋدانىنداعى تەرەڭقارا وزەنىنىڭ ارناسىنا قۇرىلىس جانە تۇرمىستىق قالدىقتار توگىلۋ فاكتىلەرى انىقتالدى. بۇل جاعداي جەرگىلىكتى بيلىك نازارىنان تىس قالمادى. اششىبۇلاق اۋىلدىق وكرۋگى اكىمدىگى زاڭ بۇزۋشىلىقتى جويۋ جانە جەردى قالپىنا كەلتىرۋ (رەكۋلتيۆاتسيالاۋ) بويىنشا ماتەريالداردى سوتقا جولداۋعا دايىندىق جۇرگىزىپ جاتىر, دەپ جازادى Egemen.kz.
بۇل ماسەلە العاش رەت بىلتىر اششىبۇلاق اۋىلدىق وكرۋگىنىڭ اكىمى باحتيار قاسىمبەكتىڭ باستاماسىمەن كوتەرىلگەن بولاتىن. ول وزەن ارناسىنا جاسالعان زاڭسىز ارەكەتتەرگە بايلانىستى بىرنەشە رەت باقىلاۋشى جانە ەكولوگيالىق مەكەمەلەرگە رەسمي حاتتار جولداعان. اكىمنىڭ تاباندىلىعىنىڭ ارقاسىندا جاعدايعا بىرقاتار مەملەكەتتىك ورگاندار نازار اۋدارىپ, ەكولوگيالىق زاڭ بۇزۋشىلىقتارعا رەسمي باعا بەرىلدى.
تەكسەرۋ بارىسىندا تۇيمەباەۆ اۋىلىنداعى جەر تەلىمىنىڭ يەسى اۋماقتى ءوز بەتىنشە تەگىستەپ, وزەننىڭ تابيعي ارناسىن ءىشىنارا جاۋىپ تاستاعانى انىقتالدى. مۇنداي ارەكەتتەر وزەننىڭ تەرەڭدىگى مەن اعىسىن وزگەرتەدى, ال بۇل ءوز كەزەگىندە ەكوجۇيەگە جانە جەرگىلىكتى تۇرعىنداردىڭ قاۋىپسىزدىگىنە قاۋىپ توندىرەدى.
اششىبۇلاق وكرۋگى اكىمدىگىنىڭ مالىمەتىنشە, جەر يەسى ەكولوگيالىق نورمالاردى بۇزعانى ءۇشىن بىرنەشە رەت اكىمشىلىك جاۋاپكەرشىلىككە تارتىلعان. وسى جىلى الماتى وبلىسى بويىنشا ەكولوگيا دەپارتامەنتىنىڭ تەكسەرىسى ناتيجەسىندە وعان 275 مىڭ تەڭگە كولەمىندە ايىپپۇل سالىنىپ, زاڭ بۇزۋشىلىقتاردى جويۋ تۋرالى نۇسقاما بەرىلگەن. الايدا بۇل تالاپ ءالى كۇنگە دەيىن ورىندالماعان.
سوعان قاراماستان, پروكۋراتۋرا اۋىل اكىمى باحتيار قاسىمبەككە دە اكىمشىلىك ايىپپۇل سالعان. قاداعالاۋ ورگانى ونى ۋاقتىلى ارەكەت ەتپەدى دەپ تانىعان. اكىمنىڭ ءوزى بۇل شەشىممەن كەلىسپەي, سوتقا شاعىمدانۋعا نيەتتى. سەبەبى ءدال ونىڭ باستاماسىمەن بۇل ماسەلە العاش كوتەرىلىپ, وبلىستىق دەڭگەيگە جەتكىزىلگەن.
«تابيعي اۋماقتاردىڭ لاستانۋ فاكتىلەرى نازاردان تىس قالمايدى. وزەن ارناسىن قالپىنا كەلتىرۋ جانە ءتارتىپ ورناتۋ جۇمىستارى جالعاسىپ جاتىر. اكىمدىك تاراپىنان باقىلاۋ كۇشەيتىلەدى», – دەلىنگەن اششىبۇلاق اۋىلدىق وكرۋگى اكىمىنىڭ اپپاراتىندا.
قازىرگى تاڭدا بارلىق قۇجاتتار بالقاش-الاكول باسسەيندىك ينسپەكتسياسىنا, ەكولوگيا دەپارتامەنتىنە جانە الماتى وبلىسى بويىنشا جەر رەسۋرستارىن باسقارۋ دەپارتامەنتىنە جولدانعان.
تەرەڭقارا وزەنى – كىشى الماتى وزەنىنىڭ سول جاق سالاسى, ول قاپشاعاي سۋ قويماسىنا قۇيادى. اششىبۇلاق اۋىلدىق وكرۋگى اۋماعىندا وزەننىڭ ۇزىندىعى شامامەن 17 شاقىرىم, ال سۋ قورعاۋ ايماعىنىڭ ەنى – 120 مەتر. ەكولوگتاردىڭ ايتۋىنشا, وزەن ارناسىنا كەز كەلگەن ارالاسۋ تابيعي تەپە-تەڭدىككە ايتارلىقتاي زيان كەلتىرۋى مۇمكىن.
الماتى وبلىسى.