جەتىسۋ وبلىسىنىڭ قاراتال اۋدانىندا بيىلعى كۇرىش جيناۋ ناۋقانى قىزۋ ءجۇرىپ جاتىر. بۇل ءوڭىر – وبلىستاعى كۇرىش وسىرەتىن جالعىز ايماق. جالپى 951 گەكتار القاپقا ەگىلگەن داقىلدان 3 مىڭ توننادان استام ءونىم الۋ جوسپارلانىپ وتىر. ورتاشا ءتۇسىم – گەكتارىنا 32,9 تسەنتنەر, دەپ حابارلايدى Egemen.kz.
كۇرىش وسىرۋمەن اۋداندا بەس شارۋاشىلىق اينالىسادى. سونىڭ ىشىندە «وپىتنوە» وندىرىستىك كووپەراتيۆى نەگىزگى ءونىم بەرۋشىلەردىڭ ءبىرى سانالادى. كووپەراتيۆ توراعاسى ەرجان قايسانوۆتىڭ ايتۋىنشا, بيىل 350 گەكتارعا «يانتار» سۇرپى ەگىلگەن. بۇل تۇقىم جەرگىلىكتى تابيعاتقا بەيىمدىلىگىمەن ءارى توزىمدىلىگىمەن ەرەكشەلەنەدى. قازىردىڭ وزىندە 70 گەكتاردان ءونىم جينالىپ, ناۋقان ويداعىداي ءجۇرىپ جاتىر.
جۇمىسقا 20 ادام مەن 15 تەحنيكا تارتىلعان. مەملەكەت تاراپىنان جەڭىلدەتىلگەن جانار-جاعارماي, تۇقىم مەن تىڭايتقىشقا سۋبسيديا بەرىلسە, تەحنيكا ليزينگ ارقىلى الىنعان. بۇعان قوسا, اۋداندا ارنايى سەرۆيستىك-دايىنداۋ ورتالىعى قۇرىلىپ, وندا 10-نان استام اۋىل شارۋاشىلىعى تەحنيكاسى شارۋالاردىڭ يگىلىگىنە بەرىلگەن.
كۇرىش جيناۋدىڭ ەرەكشەلىگى جونىندە مەحانيزاتورلار دا ءوز ويىمەن ءبولىستى. ولاردىڭ ايتۋىنشا, باستىسى – ۋاقىتتى ءدوپ باسۋ: ءدان تولىق پىسكەن, بىراق قۋراپ قالماعان كەزىن اڭداۋ. ول ءۇشىن القاپ الدىن الا قۇرعاتىلىپ, سۋى تارتىلىپ الىنادى.
ايتا كەتەيىك, بيىل جەتىسۋ وبلىسىندا جالپى ەگىس كولەمى 510,7 مىڭ گەكتارعا جەتىپ, اۋىل شارۋاشىلىعىن قولداۋعا 41,7 ملرد تەڭگە قاراستىرىلدى. ونىڭ ىشىندە 24,1 ملرد تەڭگەسى سۋبسيديا تۇرىندە بولىنگەن.