قر عىلىم جانە جوعارى ءبىلىم ءمينيسترى ساياسات نۇربەكتىڭ حابارلاۋىنشا, قازىر ەلىمىزدە جاساندى ينتەللەكت بويىنشا جالپى قۇنى 9,7 ملرد تەڭگەنى قۇرايتىن 62 جوبا جۇزەگە اسىرىلىپ جاتىر, دەپ حابارلايدى Egemen.kz.
مينيستر ۇكىمەت ماقساتتى جانە گرانتتىق باعدارلامالار ارقىلى جاساندى ينتەللەكتىنى دامىتۋعا باعىتتالعان عىلىمي زەرتتەۋلەردى جۇيەلى تۇردە قولداپ كەلە جاتقانىن اتاپ ءوتتى.
نەگىزگى ىسكە اسىرۋشىلار قاتارىندا ءال-فارابي اتىنداعى قازۇۋ, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى, اقپاراتتىق جانە ەسەپتەۋ تەحنولوگيالارى ينستيتۋتى, استانا IT ۋنيۆەرسيتەتى جانە باسقا دا جوعارى وقۋ ورىندارى مەن عىلىمي ۇيىمدار بار
«26 جوبانى 40 جاسقا دەيىنگى جاس عالىمدار جۇزەگە اسىرىپ جاتىر. بۇل جاڭا بۋىن زەرتتەۋشىلەرىنىڭ بەلسەندىلىگىن كورسەتەدى. جوبالار عىلىمنىڭ جەتى باسىم باعىتىن قامتيدى. سونىڭ ىشىندە جاساندى ينتەللەكت زەرتتەۋلەرى نەگىزىنەن وزىق ءوندىرىس, تسيفرلىق تەحنولوگيالار جانە عارىش سالاسىنا باعىتتالعان. قازىر 11 وبلىستا 27 جوعارى وقۋ ورنى مەن 6 عىلىمي-زەرتتەۋ ينستيتۋتى جي سالاسىندا بەلسەندى جۇمىس ىستەپ وتىر. بارلىعى 479 عالىم زەرتتەۋلەرگە قاتىسادى. جوبالاردىڭ ەڭ كوبى الماتى مەن استانادا شوعىرلانعان», دەدى ساياسات نۇربەك.
ايماقتىق ۋنيۆەرسيتەتتەر دە وسى سالانى دامىتۋعا قىزىعۋشىلىق تانىتقان, بىراق ولاردىڭ قاتىسۋ دەڭگەيى ءالى دە شەكتەۋلى.