ەكولوگيا ۆيتسە-ءمينيسترى نۇركەن شاربيەۆ ۇكىمەت وتىرىسىندا 23–30 قىركۇيەك ارالىعىنداعى اۋا رايى بولجامىن تانىستىرىپ, سينوپتيكتەردىڭ بولجامى بويىنشا قىركۇيەك ايىنىڭ 23-ىنەن 30-ىنا دەيىنگى ارالىقتا ەلىمىزدىڭ استىق ەگەتىن ايماقتارىندا اۋا رايى ەگىن جيناۋعا جايسىز بولاتىنىن ايتتى, دەپ حابارلايدى Egemen.kz.
سينوپتيكتەردىڭ بولجامىنا سايكەس, قوستاناي, اقمولا جانە سولتۇستىك قازاقستان وبلىستارىندا ءبىر اپتا بويى جاۋىن-شاشىن جاۋادى. اقتوبە (26–30 قىركۇيەك), باتىس قازاقستان (25–29 قىركۇيەك), قاراعاندى مەن ۇلىتاۋ وبلىستارىندا (27–30 قىركۇيەك) جاڭبىر كۇتىلەدى.
پاۆلودار وبلىسىندا 23–25 جانە 28–30 قىركۇيەك ارالىعىندا, ال شىعىس قازاقستاندا 23–24 جانە 29–30 قىركۇيەك كۇندەرى جاۋىن-شاشىن بولادى. بۇل كۇندەرى قاتتى جەل سوعىپ, اۋا تەمپەراتۋراسى بىرتىندەپ تومەندەيدى. تۇنگى ۋاقىتتا قىراۋ ءتۇسۋى ىقتيمال.
قازان ايىندا ەلىمىزدىڭ باسىم بولىگىندە ورتاشا تەمپەراتۋرا قالىپتى دەڭگەيدە ساقتالماق. دەگەنمەن, باتىس, وڭتۇستىك-باتىس جانە وڭتۇستىك ايماقتاردا اۋا رايى ادەتتەگىدەن جىلى بولادى.
«اۋا رايىنىڭ قولايسىزدىعىنا بايلانىستى استىق جيناۋعا ىڭعايلى كەزەڭدەردى بارىنشا ءتيىمدى پايدالانۋ قاجەت», دەدى نۇركەن شاربيەۆ.