وتباسىلارعا كورسەتىلەتىن كومەكتىڭ اۋقىمىن كەڭەيتۋگە, قولجەتىمدىلىكتى ارتتىرۋعا جانە سۇيەمەلدەۋدىڭ ساپاسىن جاقسارتۋ ماقساتىندا قورعانشىلىق ورگاندارى ماماندارىنىڭ سانى 303-تەن 1006-عا دەيىن ارتقان, دەپ جازادى Egemen.kz.
وقۋ-اعارتۋ مينيسترلىگىنىڭ مالىمەتىنشە, 2024 جىلعى جەلتوقساندا قازاقستان رەسپۋبليكاسىنىڭ «مەملەكەتتىك ناگرادالار, ءبىلىم بەرۋ جانە بالا قۇقىقتارىن قورعاۋ تۋرالى» زاڭىمەن العاش رەت ءاربىر 5 مىڭ بالاعا ءبىر مامان نورماسى قاراستىرىلعان بولاتىن.
سونداي-اق وڭىرلەردە قورعانشىلىق ورگاندارىنىڭ جۇمىسىن ۇيلەستىرەتىن جاڭا قۇرىلىمداردىڭ نەگىزى قالانىپ جاتىر. ماسەلەن, اقتوبە وبلىسىندا بالالاردىڭ قۇقىقتارىن قورعاۋ باسقارماسى اشىلسا, الداعى ۋاقىتتا وسىنداي بولىمشەلەر استانا قالاسىندا جانە قوستاناي وبلىسىندا ىسكە قوسىلادى.
«جاڭا شتاتتىق نورما قازاقستان ءۇشىن العاش رەت ەنگىزىلىپ وتىر جانە حالىقارالىق ستاندارتتارعا تولىق سايكەس كەلەدى. بۇل جەرگىلىكتى دەڭگەيدە تۋىندايتىن ماسەلەلەردى جەدەل شەشۋگە, سونداي-اق بالالار مەن ولاردىڭ وتباسىلارىنا ۋاقتىلى كومەك كورسەتۋگە مۇمكىندىك بەرەدى», دەدى قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا.