بۇگىن ءماجىلىس مادەنيەت جانە اقپارات مينيسترلىگى ازىرلەگەن ارحيۆ ءىسى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ءبىرىنشى وقىلىمدا ماقۇلدادى. وسى زاڭ جوباسىن ازىرلەۋ كەزىندە دەپۋتاتتار رەسپۋبليكالىق مەملەكەتتىك ارحيۆتەرگە «ۇلتتىق» مارتەبەسىن بەرۋ ماسەلەسىن كوتەردى, دەپ جازادى Egemen.kz.
ەلىمىزدەگى 2 مەملەكەتتىك ارحيۆ مارتەبە بەرۋ كريتەريلەرىنە ساي كەلەتىنى انىقتالدى. ولار: الماتى قالاسىنداعى «قازاقستان رەسپۋبليكاسىنىڭ ورتالىق مەملەكەتتىك ءارحيۆى» جانە استاناداعى «قازاقستان رەسپۋبليكاسىنىڭ ۇلتتىق ءارحيۆى».
سونىمەن قاتار جەرگىلىكتى اتقارۋشى ورگانداردىڭ ارحيۆ ءىسى سالاسىنداعى ەڭبەك قاتىناستارىن رەتتەۋ بويىنشا قۇزىرەتى كەڭەيتىلەدى. ەندى اكىمدىكتەر اۋىلدارداعى جۇمىسى ءۇشىن قوسىمشا اقى الۋعا قۇقىعى بار ارحيۆ قىزمەتكەرلەرى ءتىزىمىن انىقتاي الادى.
سونداي-اق, قازاقستاندا قۇجاتتاردىڭ بىرىڭعاي ەلەكتروندى ءارحيۆى اقپاراتتىق جۇيەسى ەنگىزىلەدى.
بەكىتىلگەن زاڭ جوباسى ارحيۆ قۇجاتتارىن قالىپتاستىرۋ, ساقتاۋ جانە پايدالانۋ سالاسىن قۇقىقتىق رەتتەۋدى كەڭەيتەدى. اتاپ ايتقاندا, تاجىريبەلىك-كونسترۋكتورلىق جانە قالا قۇرىلىسى قۇجاتتاماسى, قولجازبالار, سۋرەتتەر, سىزبالار, كۇندەلىكتەر, حات-حابارلار سياقتى ماتەريالداردى ساقتاۋ جانە پايدالانۋ نورمالارى وڭتايلاندىرىلدى.
نەگىزگى جاڭالىق «قۇجاتتاردىڭ بىرىڭعاي ەلەكتروندى ءارحيۆى» اقپاراتتىق جۇيەسىن ەنگىزۋ بولادى. ول بارلىق تسيفرلاندىرىلعان ارحيۆ قۇجاتتاماسىن ساقتاۋدى جانە مەملەكەتتىك جانە ۆەدومستۆولىق ارحيۆتەردىڭ بيزنەس-پروتسەستەرىن اۆتوماتتاندىرۋدى كوزدەيدى.
ارحيۆتەردە ساقتالاتىن ازاماتتاردىڭ دەربەس دەرەكتەرى مەن جەكە مالىمەتتەرىن قورعاۋدى قامتاماسىز ەتۋ جونىندەگى مەملەكەتتىك ارحيۆتەردىڭ فۋنكتسيالارى ناقتىلانادى.