قازاقستاندا بالالاردىڭ ءال-اۋقاتى يندەكسىن ولشەۋ اياسىندا جۇرگىزىلگەن كەشەندى الەۋمەتتىك زەرتتەۋدىڭ قورىتىندىلارى بەلگىلى بولدى. ساۋالناماعا بالالارمەن قاتار, ولاردىڭ اتا-انالارى مەن مۇعالىمدەرى دە قاتىسقان دەپ حابارلايدى Egemen.kz.
وقۋ-اعارتۋ مينيسترلىگىنىڭ حابارلاۋىنشا, ناتيجەلەر كورسەتكەندەي, جاسوسپىرىمدەردىڭ قۇقىقتىق قورعالۋى جوعارى دەڭگەيدە قالىپ وتىر. ورتاشا كورسەتكىش 90,3%-دى قۇرايدى. بۇل بالالاردىڭ ءوز قۇقىقتارىن جاقسى بىلەتىنىن ءارى ولاردى قورعاۋدىڭ قولجەتىمدى تەتىكتەرىن پايدالانا الاتىنىن ايعاقتايدى. ايماقتار اراسىندا قوستاناي وبلىسى (94,5%), ماڭعىستاۋ وبلىسى (93,5%) جانە قىزىلوردا وبلىسى (93,1%) ۇزدىك ۇشتىكتە.
«ماڭىزدى كورسەتكىشتەردىڭ ءبىرى – جاسوسپىرىمدەردىڭ ءوز ومىرىنە قاناعاتتانۋ دەڭگەيى. ورتا ەسەپپەن 10–18 جاستاعى بالالاردىڭ 85%-ى ءوزىنىڭ الەۋمەتتىك جانە پسيحولوگيالىق جاعدايىن وڭ باعالاعان. بۇل باعىتتا ەڭ جوعارى ناتيجە قوستاناي وبلىسىندا (90,1%), شىمكەنت قالاسىندا (88,7%) جانە قىزىلوردا وبلىسىندا (88,5%) تىركەلدى», دەلىنگەن حابارلامادا.
وتباسىنداعى سەنىم دە جوعارى كورسەتكىشكە يە بولعان. بالالاردىڭ 90,4%-ى اتا-اناسىمەن ەركىن سويلەسىپ, وي-پىكىرىن اشىق جەتكىزە الاتىنىن ايتقان. ەڭ جوعارى دەڭگەي ۇلىتاۋ وبلىسىندا (97,5%), استانا قالاسىندا (95,3%) جانە قوستاناي وبلىسىندا (94,7%) تىركەلگەن.
«بالالار ءال-اۋقاتى يندەكسى – بالانىڭ دەنساۋلىعى, ءبىلىمى, وتباسى جانە الەۋمەتتىك ورتاسىن قامتيتىن ماڭىزدى كورسەتكىش. ءبىزدىڭ ماقساتىمىز – ەڭ الدىمەن بالالاردىڭ ءوز ءۇنىن ەستۋ. زەرتتەۋ ناتيجەلەرى ولاردىڭ وزدەرىن قاۋىپسىز سەزىنەتىنىن, اتا-اناسىمەن جاقسى قارىم-قاتىناسىن جانە بولاشاعىنا سەنىممەن قارايتىنىن كورسەتىپ وتىر», دەدى قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
2024 جىلى بالالاردىڭ ءال-اۋقاتى يندەكسى رەسپۋبليكا بويىنشا ءوسىم كورسەتىپ, ورتاشا ءمانى 2,5 پۋنكتكە ارتىپ, 58,6 بالعا جەتكەن.