اياقتالعان اپتادا الماتى قالاسىنىڭ اكىمى دارحان ساتىبالدى عيماراتتاردى ساۋلەتتىك جارىقتاندىرۋ جۇمىستارىن جەدەلدەتۋدى تاپسىردى, دەپ جازادى Egemen.kz.
بۇگىندە مەگاپوليستەگى عيماراتتاردىڭ سىرتقى جانە ساۋلەتتىك جارىقتاندىرۋ جۇيەسىن جاڭعىرتۋ بويىنشا اۋقىمدى جۇمىس جالعاسىن تاۋىپ وتىر. باعدارلامانى ىسكە اسىرۋ قالا كوشەلەرىن اناعۇرلىم قاۋىپسىز ەتىپ, قوعامدىق كەڭىستىكتەردى كوركەيتەدى.
ەنەرگەتيكا جانە سۋمەن جابدىقتاۋ باسقارماسىنىڭ دەرەگىنشە, جىل سوڭىنا دەيىن قالاداعى 1189 اۋماقتا 20 مىڭنان استام شام مەن تورشەر ورناتىلعان. جۇمىس بارلىق اۋداندى قامتىپ, كوشەلەر تولىقتاي جارىقتاندىرىلادى. قازىردىڭ وزىندە اۋەزوۆ اۋدانىندا جوبا اياقتالىپ, مەدەۋ اۋدانىندا جالعاسىن تاپقان. باسقا اۋماقتاردا دا جۇمىس قارقىن العان.
ساۋلەتتىك جارىقتاندىرۋعا دا ەرەكشە كوڭىل ءبولىنىپ وتىر. بيىل 70 عيمارات پەن الەۋمەتتىك نىساننىڭ جارىق بەرۋ جۇيەسى جاڭارتىلماق. قازىر ونىڭ 25-ىندە جۇمىس تولىق اياقتالدى, اتاپ ايتساق, ولار تۇرعىن ۇيلەر, مەكتەپتەر, مەديتسينالىق مەكەمەلەر جانە جوعارى وقۋ ورىندارىنىڭ عيماراتتارى.
دارحان ساتىبالدى جارىقتاندىرۋ جۇيەسىن دامىتۋ قالانىڭ تۇرمىس ساپاسىمەن تىكەلەي بايلانىستى ەكەنىن اتاي كەلە: «ساۋلەتتىك جارىقتاندىرۋ جۇمىستارىن جەدەلدەتىپ, كوشە شامدارىنا قاتىستى بارلىق نىساندى قاتاڭ باقىلاۋعا الۋ قاجەت. بۇل تەك كوركەيتۋ ەمەس, قالا تۇرعىندارىنىڭ قاۋىپسىزدىگى ءۇشىن دە اسا ماڭىزدى شارۋا», – دەدى. جوبانىڭ تيىمدىلىگىن ارتتىرۋ ءۇشىن «الماتى قالا جارىق» كاسىپورنىنىڭ جۇمىسىن كۇشەيتۋ جانە زاماناۋي «اقىلدى» تەحنولوگيا ەنگىزۋ ۇسىنىلدى. ورناتىلىپ جاتقان شامدار Smart Lighting جۇيەسىنە قوسىلۋعا مۇمكىندىك بەرەتىن ارنايى قۇرىلعىلارمەن جابدىقتالعان. بۇل بولاشاقتا جارىقتاندىرۋدى اۆتوماتتى تۇردە باسقارۋعا جول اشادى.
اكىم ەنەرگەتيكا جانە سۋمەن جابدىقتاۋ باسقارماسىنا ساۋلەتتىك جارىقتاندىرۋ بويىنشا قالعان عيماراتتاردا جۇمىستى جەدەلدەتۋدى, اۋدان اكىمدىكتەرىنە رەسۋرستى جۇمىلدىرىپ, كوشە جارىعىنىڭ بارلىق نىسانىن ەرەكشە باقىلاۋدا ۇستاۋدى تاپسىردى.