قازاقستاندا سۋ شارۋاشىلىعى سالاسىنىڭ ماماندارىنا تولەنەتىن جالاقى وسەدى. بۇل وزگەرىستەر «تابيعي مونوپوليالار تۋرالى» زاڭعا ەنگىزىلگەن تۇزەتۋلەر نەگىزىندە جۇزەگە اسادى, دەپ حابارلايدى Egemen.kz.
قازىر سۋ رەسۋرستارى جانە يرريگاتسيا مينيسترلىگى مەن ۇلتتىق ەكونوميكا مينيسترلىگى زاڭدى ىسكە اسىرۋ ءۇشىن قاجەتتى نورماتيۆتىك-قۇقىقتىق قۇجاتتاردى بەكىتۋ جۇمىستارىن اتقارىپ جاتىر.
مينيسترلىكتىڭ حابارلاۋىنشا, جاڭا ەرەجە بويىنشا ەل كولەمىندە سۋمەن جابدىقتاۋ جانە سۋ بۇرۋ قىزمەتىندە ەڭبەك ەتەتىن 25 مىڭنان اسا قىزمەتكەردىڭ ەڭبەكاقىسى كوتەرىلەدى. ورتا ەسەپپەن بۇل ءوسىم ايماقتىق ەرەكشەلىكتەرگە قاراي 35–50 پايىز شاماسىندا بولادى.
سالا باسشىسى نۇرجان نۇرجىگىتوۆتىڭ ايتۋىنشا, مينيسترلىك مامانداردىڭ مارتەبەسىن ارتتىرۋ مەن جۇمىس جاعدايىن جاقسارتۋدى باستى نازاردا ۇستاپ وتىر.
«مينيسترلىك سۋ شارۋاشىلىعى سالاسى ماماندارىنىڭ مارتەبەسىن كوتەرۋ مەن ەڭبەك جاعدايىن جاقسارتۋعا ەرەكشە ءمان بەرەدى. مىسالى, بيىل «قازسۋشاردىڭ» بارلىق 425 ماۋسىمدىق جۇمىسشىسى تۇراقتى جۇمىسپەن قامتىلدى. سونداي-اق سۋ ماماندارىنىڭ بىلىكتىلىگىن ارتتىرۋ بويىنشا اۋقىمدى جۇمىس جۇرگىزىلىپ جاتىر, ونىڭ ىشىندە شەتەلدەردە دە وقىتۋ قاراستىرىلعان. قابىلدانعان بارلىق شارا رەسپۋبليكاداعى سۋ قاۋىپسىزدىگىن قامتاماسىز ەتۋدە ەڭبەك ەتىپ جۇرگەن ازاماتتاردىڭ مارتەبەسىن كوتەرۋدە ەلەۋلى پروگرەسكە قول جەتكىزۋگە مۇمكىندىك بەردى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.