ەلوردادا «كونستيتۋتسيا جانە قۇندىلىقتار: ازاماتتىق كەلىسىمنىڭ نەگىزدەرى» تاقىرىبىندا «ۇستانىم» ۇلتتىق پىكىرتالاس كلۋبىنىڭ ءتورتىنشى وتىرىسى ءوتتى. ءىس-شارا قازاقستان رەسپۋبليكاسىنىڭ كونستيتۋتسياسىنىڭ 30 جىلدىعى قارساڭىندا ۇيىمداستىرىلىپ, ازاماتتىق قاتىسۋ مەن قوعامداعى قۇندىلىق باعدارلارىن دامىتۋ ماسەلەلەرىن تالقىلاۋعا ارنالعان ماڭىزدى الاڭعا اينالدى, دەپ جازادى Egemen.kz.
وتىرىسقا قازاقستان رەسپۋبليكاسى مادەنيەت جانە اقپارات مينيسترلىگىنىڭ, مەملەكەتتىك ورگانداردىڭ, ۇكىمەتتىك ەمەس سەكتوردىڭ, سونداي-اق عىلىمي جانە ساراپشىلىق قاۋىمداستىقتىڭ وكىلدەرى قاتىستى.
كەزدەسۋ اياسىندا كونستيتۋتسيانىڭ قوعامدىق كەلىسىم شارتى رەتىندەگى ءرولى, ازاماتتىق جاۋاپكەرشىلىكتى نىعايتۋ, ازاماتتاردى شەشىم قابىلداۋ جانە مەملەكەتتىك ساياساتتى جۇزەگە اسىرۋ ۇدەرىستەرىنە تارتۋ تاجىريبەلەرى سياقتى ماڭىزدى اسپەكتىلەر قارالدى. قاتىسۋشىلار مەملەكەت پەن ازاماتتىق قوعام اراسىنداعى ءوزارا بايلانىس تەتىكتەرىن دامىتۋعا باعىتتالعان عىلىمي تاسىلدەردى, اناليتيكالىق شولۋلار جانە تاجىريبەلىك كەيستەردى ءبولىستى.
جاستار مەن قوعامدىق كەڭەستەردىڭ قاتىسۋ مادەنيەتىن, الەۋمەتتىك جاۋاپكەرشىلىكتى قالىپتاستىرۋ جانە دەموكراتيالىق قۇندىلىقتاردى نىعايتۋ ىسىندەگى رولىنە ەرەكشە نازار اۋدارىلدى.
تالقىلاۋ قورىتىندىلارى بويىنشا ازاماتتىق كەلىسىمدى ودان ءارى نىعايتۋ ءۇشىن اشىق ديالوگتى دامىتۋعا, ازاماتتىق باستامالاردى ينستيتۋتسيونالدىق قولداۋعا جانە ۇكىمەتتىك ەمەس ۇيىمداردىڭ مەملەكەتتىك باعدارلامالاردى ىسكە اسىرۋعا قاتىسۋ مۇمكىندىكتەرىن كەڭەيتۋگە باعىتتالعان ۇسىنىستار ايتىلدى.
وتىرىس اشىق پىكىرتالاس فورماتىندا ءوتتى. ءىس-شارا قۇقىقتىق مادەنيەتتى ارتتىرۋ, دەموكراتيالىق ينستيتۋتتاردى دامىتۋ جانە قوعامدى بىرىكتىرۋ جولىنداعى ماڭىزدى قادام رەتىندە باعالاندى.