قازاقستان رەسپۋبليكاسى پارلامەنتى ءماجىلىسىنىڭ توراعاسى ەرلان قوشانوۆ استاناعا رەسمي ساپارمەن كەلگەن تاجىكستان رەسپۋبليكاسى مادجليسي ولي مادجليسي ميللي توراعاسى رۋستامي ەموماليمەن كەزدەستى.
پارلامەنت دەلەگاتسياسىن قارسى العان ەرلان قوشانوۆ ارىپتەستەرىن پارلامەنتتىڭ قوس پالاتاسى دەپۋتاتتارى سايلاۋىنىڭ ءساتتى وتۋىمەن جانە جەكە رۋستامي ەموماليدى تاجىكستان مادجليسي ولي مادجليسي ميللي توراعاسى بولىپ قايتا سايلانۋىمەن قۇتتىقتادى.
– ءبىزدىڭ ەلدەرىمىزدى عاسىرلار بويى قالىپتاسقان باۋىرلاستىق, دوستىق جانە ىنتىماقتاستىق بايلانىستىرادى. قازاقستان پرەزيدەنتى قاسىم-جومارت توقاەۆ پەن تاجىكستان پرەزيدەنتى ەمومالي راحموننىڭ تۇراقتى كەزدەسۋلەرى ەكىجاقتى ىنتىماقتاستىقتىڭ دامۋىنا ەرەكشە سەرپىن بەرىپ وتىر. بۇگىندە قارىم-قاتىناسىمىز ەڭ جوعارى – وداقتاستىق دەڭگەيىنە كوتەرىلىپ كەلەدى. وسى ورايدا كوشباسشىلارىمىز قول جەتكىزگەن بارلىق كەلىسىمنىڭ جۇزەگە اسۋى جانە حالىقتارىمىز اراسىنداعى دوستىقتىڭ نىعايۋى ءۇشىن ءبىزدىڭ پارلامەنتتەرگە بەرىك زاڭنامالىق نەگىز قالىپتاستىرۋ مىندەتى جۇكتەلىپ وتىر, – دەدى ءماجىلىس توراعاسى.
تاراپتار پارلامەنتارالىق بايلانىستى ودان ءارى دامىتۋ مەن نىعايتۋ بولاشاعىن تالقىلادى. سپيكەرلەر كوپجاقتى الاڭدارداعى ىقپالداستىق پەن دوستىق توپتارى اياسىنداعى ءوزارا ءىس-ارەكەتكە ايرىقشا نازار اۋدارىپ وتىر. سونداي-اق دەپۋتاتتار زاڭ شىعارۋ سالاسىندا تاجىريبە الماسۋدى تەرەڭدەتۋگە قاتىستى بىرقاتار ماسەلەنى ورتاعا سالدى.
اڭگىمە بارىسىندا تسيفرلىق يننوۆاتسيالاردى دامىتۋعا دا باسا كوڭىل ءبولىندى. ەرلان قوشانوۆ ءماجىلىس دەپۋتاتتارى وسى باعىتتا تاجىريبە بولىسۋگە دايىن ەكەنىن ايتتى. وسى رەتتە قازاقستان بۇۇ-نىڭ ەلەكتروندى ۇكىمەتتى دامىتۋ يندەكسى بويىنشا (24-ورىن) الدىڭعى قاتارلى مەملەكەتتەر قاتارىندا ەكەنىن اتاپ ءوتتى. بۇگىندە ەلىمىزدە مەملەكەتتىك قىزمەتتەردىڭ 90 پايىزدان استامى ونلاين كورسەتىلەدى. ال ماجىلىستە «جاساندى ينتەللەكت تۋرالى» زاڭ جوباسى مەن تسيفرلىق كودەكس بويىنشا بەلسەندى جۇمىس جۇرگىزىلىپ جاتىر.
تاجىكستان پارلامەنتىنىڭ دەپۋتاتتارى قازاقستانداعى الەۋمەتتىك سالاداعى رەفورمالارعا دا قىزىعۋشىلىق تانىتتى. ءماجىلىس سپيكەرى 2019 جىلى قابىلدانعان «پەداگوگ مارتەبەسى تۋرالى» زاڭ مۇعالىمدەردىڭ الەۋمەتتىك جاعدايىن ەداۋىر جاقسارتۋعا مۇمكىندىك بەرگەنىن, سونداي-اق پەداگوگتەردىڭ قوعامداعى بەدەلىن ارتتىرۋعا قاتىستى مەملەكەت باسشىسى العا قويعان مىندەتتەردىڭ ءارى قاراي جۇزەگە اسىرىلىپ جاتقانىن ايتتى.
ءوز كەزەگىندە رۋستامي ەمومالي قازاقستاندىق تاراپقا قوناقجايلىق تانىتقانى ءۇشىن العىسىن ءبىلدىرىپ, قازىرگى ۋاقىتتاعى پارلامەنتارالىق ىنتىماقتاستىقتىڭ ءرولى ەرەكشە ەكەنىن اتاپ ءوتتى.
– قازاقستانمەن ەكىجاقتى قاتىناستاردى دامىتۋ – تاجىكستاننىڭ سىرتقى ساياساتىنداعى باسىمدىقتىڭ ءبىرى. بۇل ءوزارا تۇسىنىستىك, قۇرمەت, سەنىم جانە جاسامپاز ارىپتەستىككە ۇمتىلۋ سياقتى كونە داستۇرلەرگە نەگىزدەلگەن. سونىمەن قاتار قازاقستان مەن تاجىكستان پارلامەنتتەرى اراسىنداعى بايلانىستار ءتيىمدى پارلامەنتارالىق ءىس-ارەكەتتىڭ ۇلگىسى دەۋگە بولادى. وسى ورايدا ءبىزدىڭ پارلامەنتارالىق ىقپالداستىعىمىزدىڭ جىل سايىن كەڭەيىپ كەلە جاتقانى قۋانتادى, – دەدى مادجليسي ولي مادجليسي ميللي توراعاسى.
رۋستامي ەمومالي سونداي-اق ساۋدا-ەكونوميكا باعىتىنداعى ءوزارا ءىس-ارەكەت, ينۆەستيتسيالىق قىزمەت, يننوۆاتسيالار, اۋىل شارۋاشىلىعى جانە مادەنيەت سياقتى سالالاردا ەكى ەل اراسىنداعى ىنتىماقتاستىقتى ارتتىرۋدىڭ مۇمكىندىگى زور ەكەنىن اتاپ ءوتتى.
كەزدەسۋدى قورىتىندىلاي كەلە, تاراپتار بۇل رەسمي ساپار ەكى ەل مەن حالىقتارىمىز اراسىنداعى قارىم-قاتىناستى نىعايتۋدىڭ تاعى ءبىر ناقتى قادامىنا اينالاتىنىنا سەنىم ءبىلدىردى.