بيىل استىقتى القاپتار كوز قۋانتادى. ماساعىن ازەر كوتەرگەن ساباقتار سىڭسىپ تۇر. كوكشەتاۋ مەن قورعالجىننىڭ اراسىنداعى اقىق ءدان وسىرىلگەن ۇشى-قيىرى جوق القاپتاردا ەل ىرىزدىعىنىڭ مول ەكەنىن اڭعارۋعا ابدەن بولادى.
زەرەندى اۋدانىنداعى «ۆيكتروۆكا» سەرىكتەستىگىنىڭ 23,6 مىڭ گەكتار جەرى بار. ونىڭ 17,8 مىڭ گەكتارى – ەگىستىك القابى. 6,8 مىڭ گەكتار جايىلىم تۇياقكەس بولماعان, الۋان ءتۇرلى شوپكە تۇنىپ تۇر. ەگىستىك القاپتاردا بيداي, ارپا, س ۇلى, بۇرشاق داقىلدارى, زىعىر جانە مال ازىعىنا قاجەتتى ءشوپ ەگىلەدى. ديقاندار تەحنيكا پاركىن ساقاداي ساي ەتىپ دايىنداپتى. استىق كەپتىرگىش قۇرىلعىلار, مەحانيكالاندىرىلعان قىرمان دا دايىندالعان. سەرىكتەستىك مەملەكەت تاراپىنان كورسەتىلىپ جاتقان كومەككە رازى. كوكتەمگى ەگىس, كۇزگى وراق كەزىندە جەڭىلدەتىلگەن باعامەن قاجەتتى جانار-جاعارمايىن الادى. شارۋاشىلىق باسشىسى ۆيتالي گونچاروۆتىڭ ايتۋىنشا, بيىل العاش رەت قانت قىزىلشاسىن ەگىپتى.
«تاڭسىق شارۋانى باستادىق, – دەيدى ۆيتالي گونچاروۆ. – قارا جەردىڭ قوينىنا ءدان ەككەن ديقان جەمىستى ەڭبەگىنە ساي ناتيجەدەن دە دامەلى بولادى ەمەس پە, گەكتارىنان 30 توننادان ءونىم جيناساق دەپ وتىرمىز».
«جۋراۆلەۆكا-1» سەرىكتەستىگى 122,8 مىڭ گەكتار القاپقا ءداندى, مايلى, بۇرشاق داقىلدارى, كارتوپ جانە كوكونىس ەككەن.
«ەگىن وراعى وتە جاۋاپتى ناۋقان, – دەيدى شارۋاشىلىق باسشىسى قۋانتاي سۇلتانوۆ, – مەملەكەتتىك قولداۋدىڭ ارقاسىندا ماشينا-تراكتور پاركىنىڭ 90%-ىن جاڭارتتىق. سۋ جاڭا 64 كومباينىمىز بار. «كەڭ دالا» باعدارلاماسىمەن 6 ملرد تەڭگەدەن استام قاراجاتقا تىڭايتقىش, جانار-جاعارماي, تەحنيكا ساتىپ الدىق. بيىل ەگىن بىتىك ءوستى. وتكەن جىلى گەكتارىنا 18 تسەنتنەردەن ءونىم الساق, بيىل 23 تسەنتنەردەن بۇيىرار دەپ دامەلەنىپ وتىرمىز».
اۋىل شارۋاشىلىعى باسقارماسى باسشىسىنىڭ ورىنباسارى رەنات قاسەنوۆتىڭ ايتۋىنشا, وڭىردەگى ەگىن 5,3 ملن گەكتار القاپتا ءوسىرىلىپ جاتىر. القاپ كولەمى 2024 جىلمەن سالىستىرعاندا 128 مىڭ گەكتارعا كوپ.
«الدىن الا بولجامعا قاراعاندا, ەگىستىك القاپتاردىڭ 80%-ىنداعى جاعداي جاقسى. اگروتەحنيكالىق شارالار ۋاقىتىلى جۇرگىزىلگەن. 4,2 ملن گەكتار جەردە ارامشوپكە قارسى وڭدەۋ جۇمىسى جۇرگىزىلدى. توپىراققا 273 مىڭ توننا مينەرالدى تىڭايتقىش ءسىڭىرىلدى. وسى اۋقىمدى جۇمىستىڭ بارلىعى جەڭىلدەتىلگەن نەسيە بەرۋ باعدارلامالارىنىڭ ارقاسىندا اتقارىلدى. – دەيدى رەنات قاسەنوۆ. – بيىل 905 فەرمەر 116 ملرد تەڭگەدەن استام قاراجات كولەمىندە قولداۋعا يە بولدى.
اۋىل شارۋاشىلىعى مينيسترلىگى ستراتەگيا دەپارتامەنتى ديرەكتورىنىڭ ورىنباسارى ارايلىم الىمبەكوۆانىڭ ايتۋىنا قاراعاندا, بيىل اگرارشىلارعا جەڭىلدەتىلگەن نەسيە ەسەبىندە 700 ملرد تەڭگە قاراجات بولىنگەن. جەڭىلدەتىلگەن ليزينگكە 250 ملرد تەڭگە قاراستىرىلعان. بيىل ەلدەگى اۋىل شارۋاشىلىعى داقىلدارىن جيناۋ اۋماعى – 23,6 ملن گەكتار. ونىڭ 16 ملن گەكتارى – ءداندى جانە ءداندى-بۇرشاقتى داقىلدار. ەگىنشىلىك دەپارتامەنتى باسقارماسىنىڭ باسشىسى باقىت ءىلياسوۆتىڭ ايتۋىنشا, بيىلعى وراق ناۋقانىنا 38 مىڭ كومباين, 138 مىڭ تراكتور جانە 50 مىڭ وراق قاتىسادى. ءار ءليترى 274 تەڭگە بولاتىن 402 مىڭ توننا جەڭىلدەتىلگەن ديزەل وتىنى ءبولىنىپتى. بۇل نارىقتىق باعادان 20%-عا ارزان. وتكەن جىلدان باستاپ جەڭىلدەتىلگەن تەحنيكا ليزينگى باعدارلاماسى ىسكە قوسىلدى. ازىرگە 250 ملرد تەڭگەنىڭ جارتىسى يگەرىلگەن.
اقمولا وبلىسى