Boxingscene.com جانە RingTV سەكىلدى باق-تا قىزمەت ەتەتىن امەريكالىق جۋرناليست فرانسيسكو ا. سالاسار قازىرگى كەزدە كوپتەگەن بوكسشىلار رينگتە كەزدەسۋدىڭ ورنىنا ءبىر-بىرىمەن الەۋمەتتىك جەلىلەردە ايتىسىپ جۇرگەنىنە تەرىس كوزقاراسىن ءبىلدىردى, دەپ حابارلايدى Egemen.kz.
ول مۇنداي «جاعىمسىز مىسالداردىڭ» ءبىرى رەتىندە ورتا سالماقتاعى الەم چەمپيوندارى جانىبەك ءالىمحان ۇلى مەن كارلوس ادامەس اراسىنداعى جەلىدەگى پىكىر-تالاس ەكەنىن ايتتى.
«الەۋمەتتىك جەلىدەگى قاقتىعىستار شاكۋر ستيۆەنسون مەن «تانك» دەۆيس اراسىندا باستالدى, كەيىن جانىبەك ءالىمحان ۇلى مەن كارلوس ادامەس اراسىندا ءوربىدى. ال قازىر – كساندەر زاياس پەن ۆيوردجيل ورتيس.بوكسشىلار ءبىر-بىرىمەن رينگتە ەمەس, الەۋمەتتىك جەلىدە ايقاسقاندا بۇل جانكۇيەرلەردى جيىركەندىرىپ, سپورتقا زيانىن تيگىزەدى» –دەپ جازدى سالاسار ءوزىنىڭ ح جەلىسىندەگى پاراقشاسىندا.
ايتا كەتەيىك, جانىبەك ءالىمحان ۇلى سوڭعى جەكپە-جەگىن 2025 جىلعى 5 ساۋىردە استانادا وتكىزىپ, فرانتسۋز بوكسشىسى اناۋەل نگاميسسەنگەنى (14-1, 9 KO) 5-راۋندتا نوكاۋتپەن جەڭگەن بولاتىن. سونىمەن قاتار بۇل سالماق دارەجەسىندە كۋبالىق ەريسلاندي لارا (31-3-3, 19 كو) دا چەمپيون.
ءالىمحان ۇلى ادامەسكە جەكپە-جەك وتكىزۋ ءۇشىن كەلىسىمشارت جىبەرىلگەنىن, الايدا دومينيكاندىق بوكسشى ۇسىنىستى قابىلداماعانىن ايتقان.