بۇگىن ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى ەربولات ساتىبالدين «جەزقازعان - قىزىلوردا» تاس جولىنىڭ جاعدايىمەن تانىستى, دەپ حابارلايدى Egemen.kz.
ايماقتا «قىزىلوردا - جەزقازعان» اۆتوجولىنىڭ 200 شاقىرىمنان استام بولىگى رەكونسترۋكتسيادان ءوتىپ, جۇمىس بارلىق ۋچاسكەدە جۇرگىزىلىپ جاتىر. كەيبىر ۋچاسكەلەردە ۋاقىتشا اينالما جولدار ارقىلى قوزعالىس اشىلدى, جاڭا جولدىڭ العاشقى شاقىرىمدارى توسەلىپ, سۋ وتكىزگىش قۇبىرلار مەن كوپىر تىرەكتەرى ورناتىلىپ جاتىر. شىمتەزەك, بيتۋم جانە باسقا دا قۇرىلىس ماتەريالدارىنىڭ قازاقستانداعى كارەرلەر مەن زاۋىتتاردان جەتكىزىلۋى قولعا الىنعان.
ەربولات ساتىبالدين جوندەلىپ جاتقان جولداردىڭ ساپاسى ماسەلەسىن جەكە باقىلاۋىنا الىپ, مەردىگەرلەرگە جۇمىس قارقىنىن جەدەلدەتۋ قاجەتتىگىن ايتتى.
ءماجىلىس دەپۋتاتى تۇرعىندارمەن كەزدەسۋدە زاڭنامالىق دەڭگەيدە اتقارىلىپ جاتقان جۇمىستار تۋرالى دا ايتىپ بەردى. قازىرگى تاڭدا ماڭىزدى زاڭ جوباسى قاراستىرىلىپ جاتىر. دەپۋتاتتار اقىلى جولداردان تۇسكەن قاراجاتتى تەك سول جولداردى جوندەۋگە عانا ەمەس, حالىقارالىق جانە رەسپۋبليكالىق ماڭىزى بار تەگىن تراسسالاردىڭ جاي-جاپسارىن جاقسارتۋعا دا باعىتتاۋدى ۇسىنادى.
«ەگەر بۇرىن اقىلى جولداردان تۇسكەن قاراجات تەك سول جولداردىڭ جوندەۋ جۇمىستارىنا عانا جۇمسالسا, ەندى ول بۇكىل ينفراقۇرىلىمنىڭ دامۋىنا پايدالانىلادى. سونىمەن قاتار اۆتوكولىك يەسى اقىلى جولعا بەرەشەگى بولسا, كولىكتى ساتا المايدى نەمەسە قايتا تىركەي المايدى. جۇرگىزۋشىلەر مەن تاسىمالداۋشىلاردىڭ ءبىرىنشى ساناتتاعى اقىلى جولدار ساپاسىنا قاتىستى شاعىمدارىن تىڭداساڭىز, زاڭ جوباسىنىڭ ماڭىزى ايقىن كورىنەدى. جۇرگىزۋشىلەر اقىلى جولدى ۋاقىتىلى تولەسە دە, جول ساپاسىنىڭ تومەندىگى سالدارىنان كولىكتى جوندەۋگە قوسىمشا شىعىندانۋعا ءماجبۇر بولادى. ەگەر بۇل قاراجات تەگىن جولدارعا باعىتتالسا, ساپا ستاندارتىن ارتتىرۋعا جانە حالىقتىڭ جول ساپاسىنا دەگەن سەنىمىن نىعايتۋعا مۇمكىندىك بەرەدى», دەدى ە.ساتىبالدين.
جالپى, وتكەن جىلى وڭىردە 162 كم جول سالىنىپ, جوندەۋدەن وتكەن. وسى جىلدىڭ سوڭىنا دەيىن «قىزىلوردا - جەزقازعان» تراسساسىنىڭ 100 شاقىرىمىن رەكونسترۋكتسيالاۋ, « ۇلىتاۋ - ارقالىق» اۆتوجولىن ورتاشا جوندەۋ جانە 148 شاقىرىم جەرگىلىكتى جولداردى قالپىنا كەلتىرۋ جوسپارلانىپ وتىر.