اتا-انالار مەكتەپ فورماسىنا قارسى پەتيتسيا جاريالادى

پەتيتسيا اۆتورلارى مەكتەپ فورماسى بالالاردىڭ وقۋ ۇلگەرىمىنە اسەر ەتپەيتىنىن, وتباسى بيۋدجەتىنە قوسىمشا شىعىن تۋعىزاتىنىن ايتتى. بەلسەندىلەر جەڭىلدەتىلگەن كيىم ۇلگىسىن ەنگىزۋدى ۇسىنىپ وتىر.

ەكى بالاسى بىردەي باستاۋىش سىنىبىندا وقيتىن انا ءاليا تۇياقباەۆا فورمانى تاڭداۋ ءوز وتباسىلارى ءۇشىن قاجەت بولماعانىن ايتتى — مەكتەپ الدىن الا كيىم ۇلگىسىن جانە ونى ساتىپ الۋ كەرەك دۇكەندى بەلگىلەپ قويعان. ونىڭ ۇستىنە, ول دۇكەن برەندتىك بولىپ شىقتى, ال بالالاردىڭ سىرتقى كەلبەتىنە قويىلاتىن تالاپتار جىل سايىن كۇشەيىپ كەلەدى.

«ەكى بالاعا ءبىز شامامەن 130 مىڭ تەڭگە جۇمسادىق, بۇل سوماعا جەيدەلەر كىرمەيدى. كوستيۋم-ۇشتىك, جيلەت, شالبار, ال فاسونى — قاتاڭ ۇلگىدە, بانتيكتەر, توسبەلگىلەر. مەنىڭ ويىمشا, مەكتەپ فورماسىنىڭ ءتۇسىن عانا بەلگىلەۋ جەتكىلىكتى بولار ەدى», دەيدى ءاليا.

ساتۋشىلاردىڭ ايتۋىنشا, مەكتەپ فورماسىنىڭ باعاسى جىل سايىن 10–15 پايىزعا قىمباتتاپ وتىرادى. مىسالى, الماتىدا بلۋزكا مەن جەيدەلەردىڭ باعاسى 5 مىڭ تەڭگەدەن باستالادى, ال تولىق جيىنتىق شامامەن 35 مىڭ تەڭگەگە تۇسەدى, بۇعان اياق كيىم كىرمەيدى. 

بۇعان قاراماستان, شەنەۋنىكتەر مەكتەپ فورماسى وقۋ ۇدەرىسىنە وڭ اسەر ەتەدى دەپ ەسەپتەيدى.

«مەكتەپ فورماسى ىسكەرلىك جانە وقۋ اتموسفەراسىن قالىپتاستىرادى, وقۋشىلار اراسىنداعى تەڭدىكتى ارتتىرادى, بۋللينگتى ازايتادى, سونداي-اق بالالارعا پسيحولوگيالىق تۇرعىدان جۇمىسقا جانە تارتىپكە بەيىمدەلۋگە كومەكتەسەدى», دەدى وقۋ-اعارتۋ مينيسترلىگىنىڭ وكىلى مەرەكە امانگەلدىقىزى.

الايدا اتا-انالار بۇل پىكىرمەن كەلىسپەيدى. ولاردىڭ ايتۋىنشا, فورما وقۋ ۇلگەرىمىن ارتتىرمايدى, كەرىسىنشە شىعىندى كوبەيتىپ, وقۋشىلاردىڭ سىرت كەلبەتىن باقىلاۋعا ءماجبۇر بولاتىن مۇعالىمدەردىڭ نازارىن باسقا جاققا اۋدارادى.

پەتيتسيا باستاماشىلارى كەلەسى ۇسىنىستارىن العا تارتتى:

مىندەتتى مەكتەپ فورماسىن الىپ تاستاۋ;

ىسكەرلىك اتموسفەرانى ساقتايتىن, بىراق وقۋشىلارعا وزدەرىنىڭ دارالىعىن ەسكەرىپ, ىڭعايلى ءارى قولجەتىمدى كيىم تاڭداۋعا مۇمكىندىك بەرەتىن اقىلعا قونىمدى فورما ەنگىزۋ;

رەسۋرستاردى ءبىلىم ساپاسىن ارتتىرۋعا جانە ينكليۋزيۆتى مەكتەپ ورتاسىن قۇرۋعا باعىتتاۋ.

پەتيتسيا ۇكىمەتتە قارالۋى ءۇشىن ونى 50 مىڭ ادام قولداۋى ءتيىس.