سولتۇستىك قازاقستان وبلىسى ورتالىعىنداعى س.مۇقانوۆ اتىنداعى وبلىستىق عىلىمي, امبەباپ كىتاپحانادا « ۇلى حالىقتىڭ ۇلى ابايى» اتتى مادەني ءىس-شارا كورمەدەن باستالدى.
«سەنىمەن بولاشاق» قوعامدىق ۇيىمى وبلىستىق فيليالىنىڭ باسشىسى, ابايتانۋشى جانات مۇحامەدجانوۆ «اباي عيبراتناماسى», جەرگىلىكتى ءورىستىلدى اقىن, جازۋشىلار وداعىنىڭ مۇشەسى كيريلل فيلونوۆ«سلوۆو نازيدانيا», وبلىستىق تىلدەردى وقىتۋ ورتالىعى باسشىسىنىڭ ورىنباسارى ورال جاناتوۆ «ابايدىڭ تولىق ادام ءىلىمى», اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ كافەدرا مەڭگەرۋشىسى زارينا قانافينا «ابايدىڭ گرەك تىلىندەگى ولەڭدەرى» اتتى باياندامالار جاسادى. جەرگىلىكتى اقىندار ولەڭدەرىن وقىپ, انشىلەر ابايدىڭ اندەرىن ورىندادى.
2014 جىلى ءساۋىر ايىندا جول ءتۇسىپ, ۇلى ابايدىڭ ەلىندە بولعان ەدىك. سوندا جەرگىلىكتى ابايتانۋشى, اقىننىڭ ءومىر جولىن ۇزاق جىل زەرتتەگەن اسەت مىرزاقاسىم اعامىز «ابايدىڭ ادەبي حاتشىسى» دەگەن شاعىن تيراجبەن شىققان جيناعىن سىيلاعان. سوعان جانە باسقا دەرەككوزدەرگە سۇيەنىپ, ابايدىڭ اسىل سوزدەرىنىڭ العاش باسپا بەتىن كورگەنى تۋرالى توقتالدىق.
اتاقتى ابايتانۋشى عالىم مەكەمتاس مىرزاحمەتوۆ «ابايدىڭ تۇڭعىش ولەڭ جيناعىندا اقىننىڭ ءوز ولەڭىنىڭ سانى – 97, جولى – 3362 بولسا, اۋدارما ولەڭدەر سانى – 42, جولى – 1372. ەكى پوەماسىنىڭ ولەڭ جولى 292-گە جەتتى. ياعني 1909 جىلعى تۇڭعىش جيناقتاعى ولەڭ جولىنىڭ جيىنتىعى – 5326 بولىپ, حالقىمىزدىڭ ماڭگى توزباس قازىنا كوزىنە اينالدى», دەپ ەسكە الادى.
وسىنداي دەرەكتەر ارقىلى ابايدىڭ 180 جىلدىعىن اتاپ وتۋگە جينالعان قىزىلجارلىقتار اقىن شىعارماسىنىڭ جارىق كورۋى تۋرالى ءبىراز ماعلۇمات الىپ, مارقايىپ قالدى.
پەتروپاۆل