10 تامىزدا ەلىمىزدە ۇلتتىق بىرىڭعاي تەستىلەۋ (ۇبت) باستالىپ, 14 تامىزعا دەيىن جالعاسادى, دەپ حابارلايدى Egemen.kz.
قر عىلىم جانە جوعارى ءبىلىم مينيسترلىگىنىڭ حابارلاۋىنشا, تەستىلەۋگە قاتىسۋ ءۇشىن شامامەن 28 مىڭ ءوتىنىش قابىلداندى. ۇبت تاپسىرۋشىلاردىڭ شامامەن 65%-ى تەستىلەۋدى قازاق تىلىندە, 35%-ى ورىس تىلىندە, ال 89 ادام اعىلشىن تىلىندە تاپسىرۋعا نيەت بىلدىرگەن.
ۇبت وتكىزىلىپ جاتقان العاشقى كۇنى 2,2 مىڭ ادام تەست تاپسىرادى.
«تامىز ايىنداعى ۇبت-عا بيىلعى جانە وتكەن جىلدارداعى مەكتەپ پەن كوللەدج تۇلەكتەرى, قانداستار (قر ازاماتى بولىپ تابىلمايتىن قازاق ۇلتىنىڭ وكىلدەرى), شەتەلدە ءبىلىم العان ورتا ءبىلىم ۇيىمدارىنىڭ تۇلەكتەرى, شىعارماشىلىق ماماندىقتان باسقا ماماندىققا اۋىسقىسى كەلەتىن ستۋدەنتتەر, باسقا ماماندىقتان پەداگوگيكالىق باعىتقا اۋىسقىسى كەلەتىن ستۋدەنتتەر, سونداي-اق جوعارى وقۋ ورنىنا شارتتى تۇردە قابىلدانعان ستۋدەنتتەر قاتىسىپ جاتىر», دەپ اتاپ ءوتتى ۆەدومستۆو.
ءوز ماماندىعى بويىنشا اقىلى نەگىزدە جوو-دا وقۋىن جالعاستىرۋدى جوسپارلاعان كوللەدج تۇلەكتەرى اڭگىمەلەسۋ ناتيجەلەرى بويىنشا وقۋعا تۇسە الادى. بۇل رەتتە قابىلداۋ جوو قابىلداۋ كوميسسيالارى ارقىلى جۇزەگە اسىرىلادى.